ހުޅުމާލޭ ދެކުނު ދާއިރާގެ ރައްޔިތުންގެ މަޖިލީހުގެ މެންބަރު ޑރ. އަހްމަދު ޝަމްހީދު ކުރިޔަށް އޮތް ރިޔާސީ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޕްރައިމަރީގައި ވާދަކޮށް ޓިކެޓް ހޯދުމަށް މަސައްކަތް ކުރައްވާނެ ކަމަށް ވިދާޅުވެ، އެ ފުރުސަތު ހޯދުމަށް ބައްދަލުވުންތަކެއް ބާއްވަން އެދިވަޑައިގެން މެސެޖް ކުރައްވައިފިއެވެ.
މަޖިލީހުގެ ބައެއް މެންބަރުން ވަނީ އެމްޑީޕީގެ ޕްރައިމަރީގައި ޝަމްހީދު ކުރިމަތިލައްވަން ބޭނުންވާކަމަށް މެސެޖުކުރިކަން ކަށަވަރުކޮށްދީފައެވެ.
އެމްޑީޕީގެ ރިޔާސީ ޓިކެޓަށް ޝަމްހީދުގެ އިތުރުން ފައްޔާޒް އިސްމާއީލްވެސް ޝައުގުވެރިކަން ފާޅުކޮށްފައިވާއިރު، އެމްޑީޕީގެ ގިނަ މެންބަރުންތައް ދަނީ ކުރީގެ ރައީސް ނަޝީދު ގެންނަން ވެސް ގޮވާލަމުންނެވެ. ހަމައެހެންމެ އިބްރާހީމް މުޙައްމަދު ސޯލިހަށް ބައިއަތު ހިފައިގެން ތިބި ބަޔަކުވެސް އެ ޕާޓިގެތެރޭގައި އެބަތިއްބެއެވެ. މީގެ އިތުރުން ޢަބްދުﷲ ޝާހިދު ވެސް ރިޔާސީ ޓިކެޓަށް ޝައުގު ހުރިކަމަށް މައުލޫމާތު ލިބެއެވެ.
