ރާއްޖޭގައި އޮތް އިސްލާމީ ވެރިކަން ބަދަލުކުރުމަށް ހުޅަނގުގެ ނުފޫޒާއެކު ލާދީނީ ފިކުރުތައް އެއްވާން ފަށައިފިއެވެ.
ހުޅަނގުގެ ނުބައި ސިއްރު އެޖެންޑާގެ ދަށުން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ދަ ޑިމޮކްރެޓްސް އެއްބައިވަންތަ ކުރުމަށް ކުރީގެ ރައީސް މުހައްމަދު ނަޝީދު ވެސް މިހާރު ވަނީ މިއަދު ސޯޝަލް މީޑިއާގައި ގޮވާލާފައެވެ. ނަޝީދު އިތުރަށް ތަފްސީލު ނުދެއްވި ނަމަވެސް، މިބަޔާން ނެރެފައި މިވަނީ ރާއްޖޭގެ ސިޔާސީ މިސްރާބާއި ދީނީ އައިޑެންޓިޓީއާ މެދު ހުޅަނގުގެ ގައުމުތަކުން ބަހުސްތައް ބޮޑުވަމުން އަންނަ ދަނޑިވަޅެއްގަ އެވެ.
އެމްޑީޕީގެ ބާނީ މެމްބަރެއް ކަމަށްވާ ނަޝީދު އެ ޕާޓީން ވަކިވެވަޑައިގަތީ 2023 ވަނަ އަހަރުގެ ޖޫން މަހު އޭރުގެ ރައީސް އިބްރާހިމް މުހައްމަދު ސޯލިހާއި އެކު ކުރިމަތިވި މައްސަލައަކާ ގުޅިގެންނެވެ. ފަހުން އެމްޑީޕީގެ ތެރޭގައި އޭނާގެ އެންމެ ގާތް ބައެއް އެކުވެރިންގެ ތާއީދާއެކު ދަ ޑިމޮކްރެޓްސް އުފެއްދެވިއެވެ. ނަމަވެސް އެ ޕާޓީ ވުޖޫދުވުމަށްފަހު ބޭއްވި ރިޔާސީ އިންތިހާބާއި މަޖިލިސް އިންތިހާބުގައި ދަ ޑިމޮކްރެޓްސް އަށާއި އެމްޑީޕީއަށް ބޮޑެތި ނާކާމިޔާބީތަކެއް ލިބި، މަތީ ފަންތީގެ ބައެއް ބޭފުޅުން އަނބުރާ އެމްޑީޕީން ވަކިވެވަޑައިގެންނެވި އެވެ. އޭގެ ތެރޭގައި ޑިމޮކްރެޓިކް ޕާޓީގެ ކުރީގެ ރައީސް ހަސަން ލަތީފާއި ނައިބު ރައީސް މުހައްމަދު ޝިފާޒާއި އިލްޔާސް ލަބީބާ އެކު ނައިބު ރައީސް ކަމަށް ކުރިމަތިލެއްވި ހުސެއިން އަމްރު ހިމެނެ އެވެ.
ސެކިއުލަރ ފިކުރުގެ ނުވަތަ ލާދީނީ ފިކުރުގެ އެމްޑީޕީއާއި ޑިމޮކްރެޓްސް ގުޅެން ނަޝީދު ގޮވާލައްވަމުން ގެންދަވާއިރު، އެމްޑީޕީގެ މަތީ ފަންތީގެ ބޭފުޅުންގެ ތެރޭގައި އިސްލާމް ދީން ނޫން އެހެން ދީންތައް ރާއްޖޭގައި ފެތުރުމާއި ދެކޮޅަށް ފާޅުގައި މަސައްކަތްކުރައްވާ އެކަކުވެސް ނެތެވެ. ނަމަވެސް، ވޯޓަކާއި ގާތްވީމާ ރައްޔިތުންނަށް ދައްކަންވެގެން މިސްކިތަށް އެމްޑީޕީގެ އިސް ސަފުގައި ތިބި ބޭފުޅުން މީގެ ކުރިން އަރާފައި ފޮޓޯ ނަގައި ސޯޝަލްމީޑިއާއަށް ލާފައިވާކަން ފާހަގަ ކުރެވެއެވެ. އިންތިޚާބަށްފަހު ދެން އެމީހުން އުޅެނީ ސަފާރީތަކުގައާއި ރިސޯޓިތަކުގައެވެ. ނުވަތަ ރާއްޖެއިން ބޭރުގައެވެ. މާލޭގައި އުޅޭއިރު މިސްކިތަކަށް ނާރާކަމީ ހަގީގަތެވެ.
ދިވެހިންގެ ގިނަ ބަޔަކު ކަންބޮޑުވަނީ ލިބަރަލިޒަމް އާއި ރިފޯމްގެ ނިވާކޮށްގެން ރާއްޖޭގެ ސިޔާސީ ކަންތަކަށް އަނެއްކާވެސް ބޭރުގެ ފިކުރުތަކާއި ސެކިއުލަރ ފިކުރުތައް ވައްދަން އެމްޑީއެން އާއި ބޭރުގެ ލާދީނީ އެސޯސިއޭޝަންތައް މެދުވެރިކޮށް އެމްޑީޕީއަށް ފަންޑުކުރަން ފެށުމުންނެވެ. މި ކަންބޮޑުވުންތަކަކީ އަސާސެއް ނެތް ކަންބޮޑުވުންތަކެއް ނޫނެވެ. އައިޝަތު ވެލެޒިނީ އާއި އާޒިމް ޒާހިރު ފަދަ މީހުންނަކީ އިސްލާމްދީނާއި ދެކޮޅަށް މަސައްކަތް ކުތުމަށް އެމްޑީޕީން ގެންގުޅޭ ފަރާތްތަކެވެ. ވަކިން ހާއްސަކޮށް ވެލެޒިނީ ވަނީ ދީނީ މުއައްސަސާތަކުގެ މަސައްކަތްތައް ހުޅަނގުގެ ގައުމުތަކުގެ ސްޓައިލަށް ބަދަލުކުރުމަށް ގޮވާލާ އިސްލާމީ އިލްމުވެރިންނަށް ވަރަށް ބޮޑަށް ފާޑުވިދާޅުވި ފަރާތެކެވެ. އެމީހުންގެ ދިފާޢުގައި އަބަދުވެސް ނުކުންނަނީ އެމްޑިޕީއާއި ކުރީގެ ރައީސް ނަޝީދެވެ.
މީގެ އިތުރުން ކުރިން އިސްލާހީ ހަރަކާތްތަކާ ގުޅިފައިވާ އިނގިރޭސި ރައްޔިތެއް ކަމަށްވާ ޑޭވިޑް ހާޑިންހަމް ވަނީ އިސްލާމް ނޫން ދީންތައް ތައާރަފް ކުރުން ހިމެނޭ ގޮތަށް ރާއްޖޭގައި ދީނީ މިނިވަންކަމަށް ގިނަ ދުވަސްތަކެއް ވަންދެން ވަކާލާތު ކުރައްވާފަ އެވެ. އޭނާ އަކީ އެމްޑީޕީއާއި އަދި ކެނެރީގޭ ނަޝީދުގެ ވެސް އަރިސް، ހުޅަނގުގެ އެޖެންޓެކެވެ.
ސިޔާސީ ވާތުފިޔައިގެ މީހުން އަނެއްކާވެސް އެއްގަލަކަށް އަރައި، އެމްޑީޕީ-ޑިމޮކްރެޓްސް ކޯލިޝަނަކުން ރާއްޖޭގެ އިސްލާމީ ބިންގާ ފުނޑުފުނޑު ކޮށްލުމަށް މަސައްކަތް ކުރަމުންދަނީ ވަރަށް ސިއްރިޔާތުގައެވެ.
