ޢުމްރާވެރިން މާދަމާ އަންނާތީ ފުރާ މީހުން ކުރިން އެއަރޕޯޓަށް ދިއުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އެދިއްޖެއެވެ.
އެމްއޭސީއެލް އިން ބުނީ މާދަމާ މެންދުރު ފަހުން ޢުމްރާވެރިން ރާއްޖެ އައުމަށް ހަމަޖެހިފައިވާއިރު، އެއަރޕޯޓުގެ އޮޕަރޭޝަންތަކަށް ބާރުބޮޑުވާނެތީ ފުރާ މީހުން ވީހާވެސް ކުރިން އެއަރޕޯޓަށް ދިއުމަށް އިލްތިމާސްކުރާ ކަމަށެވެ.
ޢުމްރާ ފްލައިޓުތައް އައުމަށް ހަމަޖެހިފައިވަނީ މާދަމާ މެންދުރު ފަހު 2:00 އަދި ހަވީރު 4:00 ގައެވެ.
މިއާއެކު އެއަރޕޯޓަށް ދަތުރުފަތުރު ކުރާ އުޅަނދުތަކުންވެސް ޓްރެފިކް ފްލޯއަށް އުނދަގޫ ނުވާނެހެން އެމްއޭސީއެލް އަށް އެއްބާރުލުން ދިނުމަށް އެ ކުންފުނިން ވަނީ އެދިފައެވެ.
މިދުވަސްކޮޅަކީ ފިޠުރު ޢީދުގެ ޗުއްޓީ ނިންމާލުމަށްފަހު ވެސް ދަތުރުތައް ކުރާ ދުވަސްކޮޅެއް ކަމުން އެއަރޕޯޓު އިތުރަށް ބާރުބޮޑުވާނެ ކަމަށް ބެލެވެއެވެ.
ފުލުހުން ވެސް ވަނީ މި މަހުގެ 4 އަދި 5 ވަނަ ދުވަހު އެއަރޕޯޓަށް ޒިޔާރަތްކުރާ ފަރާތްތައް އިތުރުވެ، ޓްރެފިކް ފްލޯއަށް ބާރުބޮޑުވާނެކަމަށް ލަފާކުރެވޭތީ، މި ދެ ދުވަހު އެއަރޕޯޓަށް ދަތުރުކުރާ އެއްގަމު އުޅަނދުފަހަރު ދުއްވާ ފަރާތްތަކުން ފުލުހުން ދޭ އިރުޝާދުތަކާ އެއްގޮތަށް ޢަމަލުކުރުމަށް އިލްތިމާސްކޮށްފައެވެ.