މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއާޕާސަން އަދި ކުރީގެ އިކޮނޮމިކް މިނިސްޓަރ ފައްޔާޒު އިސްމާއިލް އެކްސް އިން ލައިކްސް އާއި ރީޓްވީޓް ގަންނަކަން ފަޅާއަރައިފިއެވެ. މިކަން ފަޅާއަރާފައި ވަނީ އޭނާގެ އަމިއްލަ ޕާޓީގެ ތެރޭގައި އޭނާއަށް އޮތް ތާއީދު ކުޑަވެ، އެ ޕާޓީ ކަފިކަފިވެ ބައިބައި ވެފައިވާ ދަނޑިވަޅެއްގައެވެ.
ފައްޔާޒު ވަނީ ފާއިތުވި އަހަރެއްހާ ދުވަހުގެ ތެރޭގައި ކޮރަޕްޝަންގެ އެތައް ތަހުގީގުތަކެއްގައި ޝާމިލްވެފަ އެވެ. ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގެ ތެރޭގައި ހިންގި ވައްކަންތަކުގައި އޭނާ އަށް ބައި އަޅާފައިވާކަމަށް ޔަގީންވެ، އެކަމާއި މެދު ސުވާލު ކުރުމަށް މޯލްޑިވްސް ޕޮލިސް ސަރވިސް އިން މިދިޔަ އަހަރު މާރޗް ގައި އޭނާ އަށް ޗިޓް ފޮނުވިކަން ވެސް ފާހަގަ ކުރެވެއެވެ. އާރުޑީސީއާ ގުޅުން ހުރި ކުންފުންޏަކުން ފައިސާ ލިބުނު ކަމަށް ފައްޔާޒު އެއްބަސްވި ނަމަވެސް އެ ފައިސާއަކީ ޕާސަނަލް ލޯނެއް ކަމަށް އޭނާ ބުނި ކަމަށް ވެއެވެ. އޭނާގެ މައްޗަށް ޖިނާއީ އެއްވެސް ކުށެއްގެ ދައުވާ އުފުލާފައި ނުވާ ކަމަށް ވިދާޅުވެ، ސަރުކާރުން އޭނާއާ ދެކޮޅަށް ސިޔާސީ އެޖެންޑާއެއް ކުރިޔަށް ގެންދާ ކަމަށް އޭނާ ބުނެފައިވާއިރު، ވެރިކަމަށް ފެންބޮވައިގެންފައިވާ ފައްޔާޒު އިސްމާޢީލް ސޯޝަލް މީޑިއާގައި ފައިސާ ދީގެން އޭނާގެ މަޤްބޫލްކަން ރައްޔިތުންނަށް ދެއްކުމަށްޓަކައި ތާޑް ޕާރޓީ ޕްލެޓްފޯމްތައް ބޭނުންކޮށްގެން އެކްސް އަށް ފައިސާ ދައްކާކަން ފަޅާއަރާފައިވާއިރު، އެމްޑިޕީގެ ތެރޭގައި އޭނާ އިތުރަށް ވާނީ ފަޟީޙަތެވެ.
އެކްސްގައި ފައްޔާޒު އޭނާ މިއަދު ކުރި ޕޯސްޓު ރިޓްވީޓު ކޮށްފައިވާ ބޮޓް ހޭންޑަލްސްތައް
ރައީސުލްޖުމްހޫރިއްޔާ ޑރ. މުޢިއްޒު، ސިގިރޭޓް ބޭން ކުރުމަށް ރައްޔިތުންގެ ހިޔާލު ހޯދުމަށްޓަކައި މިއަދު ކުރި އެކްސްއަށް ފައްޔާޒު ކުއޯޓް ޓުވީޓް ކޮށްފައިވާއިރު އެ ޓުވީޓަށް 5 ގަޑިއިރުވި އިރު ލިބިފައިވަނީ 80 ވަރަކަށް ލައިކާއި 40 ވަރަކަށް ރިޓުވީޓެވެ. ނަމަވެސް އޭގެ ދިހަ ވަރަކަށް މިނެޓު ފަހުން ލައިކުގެ އަދަދު ވަނީ 300 އަށްވުރެ މަތިވެފައެވެ. އަދި ރިޓުވީޓުގެ އަދަދު ވަނީ 200 އަށްވުރެ މަތިވެފައެވެ. ލައިކް/ރީޕޯސްޓު ކޮށްފައި ހުރީ %80 ބޮޓު އެކައުންޓްސްތަކެއްކަން ފާހަގަކުރެވެއެވެ.
މިއީ އެދެވޭ ސަމާލުކަމެއް ނުލިބުމުން އެމީހަކަށް ތާއީދު އޮތް ކަމަށް ދެއްކުމަށް މީހުން ކޮށްއުޅޭ ކަމެކެވެ.
ފައްޔާޒަކީ ވަރަށް ކޮރަޕްޓް މީހެއް ކަމަށް ކުރިން ރައްޔިތުން ބުނަމުން ދިޔައިރު އެކަމުގެ ހެކި ފެންނަން ފެށީ އެ ވެރިކަން ނިމުމުންނެވެ. ޕޮލިސް ސްޓޭޝަންތައް ހަދަން ކޮންޓްރެކްޓް ކުރި ކުންފުންޏަކުން އޭގެ ބަދަލުގައި މާލޭގައި އަމިއްލަ ގެ އަޅަމުން ދިޔަ މައްސަލަ ވެސް ވަނީ ފަޅާއަރާފައެވެ. މިކަމުގެ ސަބަބުން އިކޮނޮމިކް މިނިސްޓަރުގެ މަގާމުގައި އޭނާ ހުންނެވި ދުވަސްވަރު ދައުލަތުގެ ފައިސާ ނަހަމަގޮތުގައި ބޭނުންކުރިކަން ވެސް އެނގެއެވެ.
