އޮރިޔާން ކާޑު ގެންގުޅެ، ކުރީގެ އަންހެނުންނަށް ބިރުދެއްކި މީހަކު ހައްޔަރުކޮށްފިއެވެ.
ފުލުހުން ބުނީ މި މައްސަލައާ ގުޅިގެން ހައްޔަރުކޮށްފައިވަނީ އުމުރުން 57 އަހަރުގެ މުޙައްމަދު ޒުބައިރު، ދަފްތަރު ނަންބަރު އާރުއެސް 1704 ކަމަށެވެ.
އޭނާ ބަންދުކުރުމަށް ކްރިމިނަލް ކޯޓުން ނެރުނު ޢަމުރުގައި ބުނެފައިވަނީ އޭނާގެ މައްޗަށް ކުރެވެނީ ހުއްދަނެތި ގޯތި ގެދޮރަށް ވަނުމާއި، އޮރިޔާން ކާޑު ގެންގުޅުމާއި، ބްލެކްމެއިލް ކުރުމާއި ބިރުދެއްކުމުގެ ތުހުމަތު ކަމަށެވެ.
އެ ޙާދިސާގެ ރިޕޯޓާއި، އަނިޔާ ލިބުނު މީހާގެ ބަޔާނާއި އިތުރު ހެކިތައްވެސް ލިބިފައިވާތީ، ޒުބައިރުގެ މައްޗަށް ތުހުމަތުކުރެވޭ ކުށްތައް އޭނާ ކުރިކަމަށް ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށް ކްރިމިނަލް ކޯޓުގެ ބަންދު ޢަމުރުގައި ބުނެފައިވެއެވެ.
ކްރިމިނަލް ކޯޓުން މިއަދު ވަނީ ޒުބައިރުގެ ބަންދަށް 10 ދުވަސް ޖަހާފައެވެ.
