ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހއ. ތަކަންދޫއަށް ވަޑައިގެންފިއެވެ.
މިއީ އެމަނިކުފާނު މިހާރު ހއ. އަށް ކުރައްވާ ތިން ދުވަހުގެ ދަތުރުފުޅުގެ ތެރެއިން ފަސްވަނައަށް ވަޑައިގެންނެވި ރަށެވެ.
ތަކަންދޫގެ ރައްޔިތުން ވަނީ ރައީސަށް ހޫނު މަރުޙަބާއެއް ދަންނަވާފައެވެ. އެގޮތުން އެ ރަށު ބަނދަރު ސަރަޙައްދަށް ވަރަށް ގިނަ ބަޔަކު އެއްވެތި ތިބިކަން ފާހަގަ ކުރެވެއެވެ. އެ އެންމެން ވަނީ އުފާވެރި ރޫހެއްގައި ރައީސަށް މަރުޙަބާ ދަންނަވާފައެވެ.
ރައީސް ޑރ. މުޢިއްޒު ހއ. ތަކަންދޫއަށް ވަޑައިގެންނެވުމުން އެރަށުން މަރުޙަބާ ދަންނަވަނީ.
ރައީސްގެ މި ދަތުރުފުޅުގައި ތަކަންދޫގެ ތަރައްޤީއަށް މުހިންމު ދެ މަޝްރޫޢެއް ފައްޓަވައިދެއްވާނެއެވެ. އެގޮތުން، އަލަށް އިމާރާތްކުރާ ކައުންސިލް އިދާރާގެ ބިންގާ އަޅުއްވައިދެއްވުމާއި، ފުލުހުންގެ އައު މަރުކަޒު ހުޅުއްވައިދެއްވުން ހިމެނެއެވެ.
މީގެއިތުރުން، ތަކަންދޫ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި، ރަށުގެ މުއައްސަސާތަކުގެ އިސްވެރިންނާ ބައްދަލުކުރައްވައި ރަށުގެ ތަރައްޤީއާ ގުޅޭ މަޝްވަރާތަކެއް ކުރައްވައި. އަދި ރައްޔިތުންނާއި ސީދާ ބައްދަލުކުރައްވައި، އެބޭފުޅުންގެ ކަންބޮޑުވުންތަކަށް އަޑުއައްސަވާނެއެވެ.
ރައީސް މުޢިއްޒުގެ މި ދަތުރުފުޅަކީ ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމުގެ ސިލްސިލާގެ ތެރެއިން ކުރައްވާ ދަތުރުފުޅެކެވެ. މި ދަތުރުފުޅުގައި ހއ. އަތޮޅުގެ 10 ރަށަކަށް ވަޑައިގަތުމަށް ވަނީ ހަމަޖެހިފައެވެ. ދަތުރުފުޅު ނިންމަވާލައްވާނީ މާދަމާއެވެ.
ރައީސްގެ އަރިހުގައި މި ދަތުރުފުޅުގައި ބައެއް ވަޒީރުންނާއި ސަރުކާރުގެ އިސް ބޭފުޅުން ބައިވެރިވެވަޑައިގަންނަވައެވެ. މި ދަތުރުފުޅުގެ މަޤްޞަދަކީ ރަށްރަށުގެ ތަރައްޤީގެ މަޝްރޫޢުތައް ބައްލަވާލެއްވުމާއި، ރައްޔިތުންގެ ޚިޔާލު ހޯއްދެވުމާއި، ސަރުކާރުގެ ސިޔާސަތުތަކާ ގުޅޭގޮތުން މަޢުލޫމާތު ދެއްވުމެވެ.