މި ސަރުކާރު ވެރިކަމާ ހަވާލުވުމަށްފަހު މިހާތަނަށް އޮޑިވެރިންނަށް 981 މިލިޔަން ރުފިޔާ ދޫކޮށްފައިވާކަމަށް ސަރުކާރުގެ މަސް ކުންފުނި މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޓެޑް (މިފްކޯ) އިން މިއަދު ހާމަކޮށްފިއެވެ.
މިފްކޯއިން ބުނީ، 2023 ވަނަ އަހަރުގެ ނޮވެމްބަރު 17 އިން 2024 ވަނަ އަހަރުގެ ޑިސެމްބަރު 28 އާ ހަމައަށް މިފްކޯއަށް ޖުމްލަ 55،925 މެޓްރިކް ޓަނުގެ މަސް ކިރުވާފައިވާކަމަށެވެ. މި މުއްދަތުގައި ކިރުވާފައިވާ މަހަށް 981،126،385 ރުފިޔާ އޮޑިވެރިންނަށް ދޫކޮށްފައިވާކަމަށް މިފްކޯއިން ހާމަކުރިއެވެ.
މި ސަރުކާރު ވެރިކަމާ ހަވާލުވިއިރު، މަސް ދޯނިތަކުން ކިރުވާފައިވާ މަހަށް އޮޑިވެރިންނަށް ދޭންޖެހޭ 230 މިލިޔަނަށްވުރެ ގިނަ ރުފިޔާ އޮތްކަމަށާއި، ނަމަވެސް ސަރުކާރުން ވަނީ އެ ފައިސާ ދީ ހަލާސްކޮށް ބެކްލޮގް އެއްކޮށް ފިލުވާލާފައި ކަމަށް މިފްކޯއިން ފާހަގަކުރިއެވެ.
އެގޮތޮން، މިހާރު ސަރުކާރުން ދަނީ 48 ގަޑިއިރުގެ ތެރޭގައި އޮޑިވެރިންނަށް ފައިސާ ދޫކުރަމުންނެވެ. މި ނިޒާމު ހަރުދަނާކޮށް ހިންގުމުގައި ބޭންކް އޮފް މޯލްޑިވްސްއާއި، މާލީ ވުޒާރާއާއި މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާގެ ފަރާތުން ވަރަށް ބޮޑު އެހީތެރިކަމަކާއި އެއްބާރުލުމެއް ލިބެމުންދާކަމަށް މިފްކޯއިން ބުންޏެވެ.
މީގެއިތުރުން، މި ސަރުކާރުން ދަނީ ރާއްޖޭގެ މަސްވެރިކަމުގެ ސިނާޢަތް ކުރިއަރުވައި ސިންދަފާތުކުރުމަށް ގިނަ މަސައްކަތްތަކެއް ކުރަމުންނެވެ. މަސްވެރިކަމުގެ ސިނާޢަތަށް ދިމާވެފައިވާ މައްސަލަތަކަށް ސަރުކާރުގެ ފުރަތަމަ 3 އަހަރުގެ ތެރޭގައި ހައްލު ލިބިގެންދާނެކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން ވަނީ ބުނެފައެވެ.
