ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)އިން ރާއްޖޭގެ ސިޓީތަކާއި ރަށްރަށުގެ ކުނި އުކާލާ އަމިއްލަ އުޅަނދުތަކުން ނަގާ ގޭޓް ފީ ކުޑަކޮށްފިއެވެ.
މި ބަދަލާއެކު، ކުނި އުކާލާ އުޅަނދުތަކުން ނަގަމުންދިޔަ ޓަނަކަށް 212 ރުފިޔާގެ އަގު މިހާރު ވަނީ ޓަނަކަށް 106 ރުފިޔާއަށް ދަށްވާނެ ކަމަށް ވެމްކޯ ހާމަކުރިއެވެ.
ވެމްކޯއިން ބުނީ، މި ބަދަލު ގެނެވިފައިވަނީ މިއަދުން ފެށިގެންކަަމަށެވެ. އަދި މި ބަދަލު ގެނެވިފައިވަނީ ކުނި އުފުލާ އުޅަނދުގެ ރަޖިސްޓަރީކުރެވިފައިވާ ބަރުދަނަށް ބަލައިގެންނާނެކަމަށް ވެސް ވެމްކޯއިން ބުންޏެވެ.
އެގޮތުން، ކުނި އުކާލުމަށް ވެމްކޯއިން ނަގަމުން އަންނަ އަގުތައް ކުޑަކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދުފުޅެއްކަން ފާހަގަކޮށްލެވެއެވެ. މި ބަދަލާއެކު، އެ ވައުދުފުޅު ފުއްދުމަށް އިތުރު ފިޔަވަޅެއް އެޅިފައިވާކަން ފާހަގަކުރެވެއެވެ.
މީގެ އިތުރުން، ވެމްކޯއިން ވަނީ ރާއްޖޭގެ މީހުން ދިރިއުޅޭ ހުރިހާ ރަށަކުން ވެސް ކުނި ބޭރުކުރުމަށް ބޮޑު މަޝްރޫޢެއް އަންނަ މަހު ފެށުމަށް ތައްޔާރުވަމުން އަންނަ ކަމަށް ހާމަކޮށްފައެވެ. މި މަޝްރޫޢުގެ ސަބަބުން ރާއްޖޭގެ ހުރިހާ ރަށެއްގައިވެސް ކުނި މެނޭޖްކުރުމުގެ ނިޒާމު ހަރުދަނާވެގެންދާނެ ވެމްކޯއިން ބުންޏެވެ.
ރައްކާތެރިގޮތުގައި ކުނި މެނޭޖުކުރުމަށް ވެމްކޯއިން ކުރަމުން އަންނަ މަސައްކަތުގެ ތެރެއިން މާލެއާއި އެނޫންވެސް ސިޓީތަކުގެ އިތުރުން މާލެ އަތޮޅު މާފުއްޓާއި ހިންމަފުށީގައި ވެސް ޚިދުމަތް ވަނީ ފަށާފައެވެ. މިއީ ރާއްޖޭގެ ތިމާވެށި ހިމާޔަތްކުރުމަށާއި، ރަށްރަށުގެ ސާފުތާހިރުކަން ދެމެހެއްޓުމަށް އެޅޭ މުހިންމު ފިޔަވަޅެއް ކަމަށް ވެމްކޯއިން ހާމަކުރިއެވެ.
