އައްޑޫގެ ކަރަންޓުގެ ހިދުމަތަށް މިއަދު ދިމާވި މައްސަލަ މިހާރު ހައްލުކޮށްފައިވާ ކަަމަށް ފެނަކަ ކޯޕަރޭޝަނުން ބުނެފި އެވެ.
އައްޑުއަށް ކަރަންޓުގެ ހިދުމަތް ދޭ ފެނަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ނަޖާހު ވިދާޅުވީ އައްޑޫގެ ކަރަންޓުގެ ހިދުމަތަށް މިއަދު ދިމާވި މައްސަލަ މިހާރު މައިގަނޑު ގޮތެއްގައި ހައްލުކުރެވިފައިވާ ކަމަށެވެ.
ނަމަވެސް، މަރަދޫފޭދުއަށް ކަރަންޓުގެ ހިދުމަތް އަލުން ދިނުމުގައި ކުޑަ މައްސަލައެއް އުޅޭ ކަމަށާއި އެކަން މިހާރު ހައްލުކުރަމުން އަންނަ ކަމަށެވެ.
އައްޑޫގެ ގުޅިފައިވާ ރަށްތަކުން ކަރަންޓުގެ ހިދުމަތް މެދުކެނޑުނީ މިއަދު ހެނދުނު 9 ޖަހާކަށް ހާއިރެވެ.
އައްޑޫގެ ކަރަންޓުގެ މައްސަލަ ބޮޑުވުމުން އެކަމަށް ދާއިމީ ހައްލެއް ހޯދުމަށް ފެނަކަ ކޯޕަރޭޝަނުން ވަނީ ޗައިނާގެ ކުންފުންޏަކާ އެކު އެއްބަސްވުމެއް މިދިޔަ އަހަރު ހަދައިފަ އެވެ. އެ އެއްބަސްވުމުގެ ދަށުން އައްޑޫގައި އެންމެ ޒަމާނީ ވަސީލަތްތަކާ އެކު، 30 މެގަވޮޓްގެ އާ އިންޖީނުގެއެއް އައްޑޫގައި ހަދާނެ އެވެ.
