އިންޑިއާގެ ކުރީގެ ބޮޑުވަޒީރު ޑރ. މަންމޯހަން ސިންގ އަވަހާރަވުމާ ގުޅިގެން، ތަޢުޒިޔާ ފޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ސޮއިކުރައްވައިފިއެވެ.
މަންމޯހަން ސިންގް އަވަހާރަވުމާ ގުޅިގެން ރާއްޖޭގައި ހުންނަ އިންޑިއާގެ ހައި ކޮމިޝަނުގައި ވަނީ އެމަނިކުފާނު ހަނދާނުގައި ތައުޒިޔާގެ ދަފްތަރެއް ހުޅުވާފައެވެ.
ޑރ. މަންމޯހަން ސިންގ އަވަހާރަވީ 26 ޑިސެމްބަރ 2024 ގައެވެ. އެމަނިކުފާނުގެ އަވަހާރަވުމާ ގުޅިގެން ރައީސް މުޢިއްޒު ދެއްވި މެސެޖުގައި، ޑރ. ސިންގ އަކީ މަތިވެރި ދައުލަތްވެރިއެއް ކަމުގައި ފާހަގަކުރައްވާފައިވެއެވެ.
ރައީސް މުޢިއްޒުގެ މެސެޖުގައި، 2011 ވަނަ އަހަރުގެ ނޮވެމްބަރު މަހު ޑރ. ސިންގ ރާއްޖެއަށް ކުރެއްވި ތާރީޚީ ދަތުރުފުޅަކީ އިންޑިއާއާއި ރާއްޖެއާ ދެމެދު އޮތް ރަޙްމަތްތެރިކަމުގެ ގުޅުން އިތުރަށް ބަދަހިކުރި މުހިންމު މަރުޙަލާއެއް ކަމުގައި ހަނދާންކޮށްދެއްވާފައިވެއެވެ.
މީގެ އިތުރުން، މި ފުން ހިތާމައިގެ ވަގުތުގައި ޑރ. ސިންގގެ ޢާއިލާއަށާއި އިންޑިއާ ސަރުކާރަށާއި ރައްޔިތުންނަށް، ދިވެހި ސަރުކާރާއި ރައްޔިތުންގެ ނަމުގައި ތަޢުޒިޔާ ދަންނަވާފައިވާކަން ރައީސް މުޢިއްޒުގެ މެސެޖުގައި ފާހަގަކުރެއްވިއެވެ.
ޑރ. މަންމޯހަން ސިންގ އަކީ އިންޑިއާގެ 13 ވަނަ ބޮޑުވަޒީރެވެ. އެމަނިކުފާނު އިންޑިއާގެ ބޮޑުވަޒީރުކަން ކުރެއްވީ 2004 އިން 2014 އަށެވެ. އަވަހާރަވީއިރު އެމަނިކުފާނުގެ އުމުރުފުޅަކީ 91 އަހަރެވެ.
