ދިވެހިރާއްޖޭގެ އަޑުގެ ޚިދުމަތް ފުޅާކޮށް، އަތޮޅުތަކުން ގިނަ ޕްރޮގްރާމްތަކެއް ގެނައުމަށް އެދިވަޑައިގަންނަވާކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ދިވެހިރާއްޖޭގެ އަޑުގެ 62ވަނަ އަހަރީ ދުވަހުގެ މުނާސަބަތުގައި ދެއްވި ޚާއްޞަ ބަސްތީގަތުމެއްގައެވެ.
މި ބަސްތީގަތުމުގައި މަޖިލިސް ރައީސް ވަނީ އެމަނިކުފާނުގެ އަމިއްލަ ތަޖުރިބާ ހިއްސާކުރައްވާފައެވެ. އެގޮތުން ހައްދުންމަތީ އަތޮޅު އޮފީހުގައި މަސައްކަތްކުރެއްވި ދުވަސްވަރު "އަތޮޅު ހަފްތާ ޚަބަރު" ވިދާޅުވިކަން ފާހަގަކުރެއްވިއެވެ. އޭރު އަތޮޅު އޮފީހުން އަތޮޅުގެ ރަށްރަށުގައި ހިނގާ ކަންކަން ބަލައި، އެ ޚަބަރު އެއްކުރެއްވި ކަމަށާއި، އެމަސައްކަތުގައި އެމަނިކުފާނު ޢަމަލީގޮތުން އުޅުއްވިކަމަށް ވިދާޅުވިއެވެ.
"އަތޮޅު ހަފްތާ ޚަބަރު، އެދުވަސްވަރު އަޅުގަނޑު މަސައްކަތް ކުރީ ލ. އަތޮޅު އޮފީހުގައި. ދެން ބައެއް ދުވަސްތަކުގައި އެ ޚަބަރު ކިޔަން ހުންނަ ކުއްޖާ ބަލިވެގެން، ނޫނީ ޗުއްޓީއެއްގައި ހުރެގެން ނާދެވި ހިނގައިދާނެ. ދެން އެ ޚަބަރު އަސްލު ތައްޔާރުކުރަނީ އަޅުގަނޑުމެން. ތައްޔާރުކުރީމަ އެކުއްޖަކު އައިސް ކިޔަނީ. އެހެން ދިމާވާ ބައެއް ދުވަސްދުވަހު ހުންނާނެ އަޅުގަނޑުވެސް ޚަބަރު ކިޔާފައި" މަޖިލިސް ރައީސް ވިދާޅުވިއެވެ.
މަޖިލިސް ރައީސް ވަނީ މިފަދަ ޕްރޮގްރާމްތަކަކީ އޭރުވެސް އަދި މިހާރުވެސް މުހިންމު ޕްރޮގްރާމްތަކެއްގެ ގޮތުގައި ސިފަކުރައްވާފައެވެ. އަދި ދިވެހިރާއްޖޭގެ އަޑުގެ ޚިދުމަތް ފުޅާކުރަން މިފަދަ މަސައްކަތްތައް އަތޮޅުތަކުގައި ކުރިއަށްގެންދިއުމަށް އެދިވަޑައިގެންނެވިއެވެ.
"ދިވެހިރާއްޖޭގެ އަޑުގެ ޚިދުމަތް މިހާރަށްވުރެ ރަނގަޅުކުރަން ޖެހޭކަމަށް އަޅުގަނޑު ޤަބޫލުކުރަނީ. ފުޅާކުރެއްވިއްޖެއިއްޔާ މުސްތަޤުބަލެއް އޮތްކަމަށް އަޅުގަނޑު ޤަބޫލުކުރަން. ފުޅާކުރާއިރު މާލޭގައި އެކަނި މިކަން ނުކުރެވޭނެ. އަތޮޅުތަކަށް އެބަޖެހޭ މި ޚިދުމަތްދާން." މަޖިލިސް ރައީސް ވިދާޅުވިއެވެ.
މީގެއިތުރުން، ދިވެހިރާއްޖޭގެ އަޑަށް 62 އަހަރުވީއިރު މިއީ ރާއްޖޭގެ އެންމެ ގިނަ ދުވަސްވީ ޚަބަރު ފަތުރާ ވަސީލަތްކަން ފާހަގަކުރައްވާފައެވެ. އެހެންކަމުން މި ޚިދުމަތް ދަމަހައްޓަން މަސައްކަތް ކުރަންޖެހޭކަމަށްވެސް ރައްޔިތުންގެ މަޖިލީހުގެ ރައީސް ވިދާޅުވިއެވެ.
