މިއަދު ހެނދުނު 10:30 ހާއިރުން ފެށިގެން މާލެއަށް ބޯކޮށް ވާރޭ ވެހި ގުގުރަން ފަށައިފިއެވެ.
މެޓު އޮފީހުން މީގެ ކުޑައިރުކޮޅެއް ކުރިން ބުނެފައިވަނީ މިއަދު 9:30 އިން ފެށިގެން 15:30 އަށް ކ. އަތޮޅުން ފެށިގެން ގއ. އަތޮޅަށް ބޯކޮށް ވާރޭ ވެހުމާއެކު ގުގުރާނެ ކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް ލަފާކުރެވޭ ކަމަށެވެ.
މޫސުމަށް ސަމާލުވާން އެދި އެ އިދާރާއިން ވަނީ ހުދު ސަމާލުވެސް ނެރެފައެވެ. ފާއިތުވި 24 ގަޑިއިރަށް ބަލާއިރު އެންމެ ބޯކޮށް ވާރޭ ވެހިފައިވަނީ ލ. ކައްދޫއަށެވެ. މެޓް އޮފީހުގެ ތަފާސްހިސާބުތައް ދައްކާގޮތުން ފާއިތުވި 24 ގަޑިއިރު ލ. ކައްދޫއަށް 159.5 މިލިމީޓަރުގެ ވާރޭ ވަނީ ވެހިފައިވެއެވެ.
