ބެންކޮކްގައި ބޭއްވި ބިމްސްޓެކް ސަމިޓުގައި އިންޑިއާގެ ބޮޑުވަޒީރު ނަރެންދުރަ މޯދީ އާއި ބަންގްލަދޭޝްގެ ވަގުތީ ލީޑަރު މުހައްމަދު ޔޫނުސް މުހިންމު ބައްދަލުކުރެއްވުމެއްގައި މަޝްވަރާތައް ކުރައްވައިފިއެވެ.
މިއީ މިދިޔަ އޮގަސްޓް މަހު ބަންގާޅުގައި ހިނގި ސިޔާސީ ހަމަނުޖެހުންތަކަށް ފަހު ދެގައުމުގެ ދެމެދުގައި ބޭއްބި ފުރަތަމަ ރަސްމީ މަޝްވަރާއެވެ. މި މަޝްވަރާތަކުގެ މަޤްޞަދަކީ އިންޑިއާގައި ހިމާޔަތް ހޯއްދެވި ކުރީގެ ބޮޑުވަޒީރު ޝައިޚް ހަސީނާ ވެރިކަމުން ދުރުކުރުމާ ގުޅިގެން އިންޑިއާ އާއި ބަންގްލަދޭޝާއި ދެމެދު އުފެދިފައިވާ ގުޅުންތައް ރަނގަޅު ކުރުމެވެ.
އިންޑިއާގެ ބޮޑުވަޒީރު ނަރެންދުރަ މޯދީ އާއި ބަންގްލަދޭޝްގެ ވަގުތީ ލީޑަރު މުހައްމަދު ޔޫނުސް - މޯދީ ވަނީ ދެގައުމުގެ ގުޅުން ބަދަހިކޮށް ސެކިއުރިޓީ ކަންކަމުގައި އެއްބާރުލުން ދިނުމަށް އެދިވަޑައިގެންފަ.
ބޮޑުވަޒީރު މޯދީ ވަނީ ދެގައުމުގެ ގުޅުން އިތުރަށް ގޯސްވެދާނެ ފަދަ ބައިބައިވުމުގެ ވާހަކަތަކުން ދުރުހެލިވުމުގެ މުހިންމުކަން ފާހަގަކުރައްވާފައެވެ. އޭނާ ވަނީ ބަންގްލަދޭޝުން ބައި މަދު ކޮމިއުނިޓީތަކާއި ޚާއްސަކޮށް ހިންދޫންނާ މެދު އަމަލުކުރާ ގޮތާ މެދު ކަންބޮޑުވުންތައް ފާހަގަކުރައްވާފަ އެވެ.
ބަންގްލަދޭޝްގެ 91.04 ޕަސެންޓް ނުވަތަ 150 މިލިއަނަށްވުރެ ގިނަ މުސްލިމުން ތިބޭއިރު ހިންދޫ ދީނުގެ މީހުންގެ އާބާދީއަކީ 13.13 މިލިއަނެވެ. އެއީ އެގައުމުގެ އާބާދީގެ 7.95 ޕަސަންޓެވެ.
މޯދީ ގޮވާލެއްވީ ހުރިހާ ރައްޔިތުންގެ ރައްކާތެރިކަން ކަށަވަރު ކުރުމަށްޓަކައި އަނިޔާވެރިކަމުގެ ފުރިހަމަ ތަހުގީގުތަކެއް ކުރުމަށެވެ.
ގިނަ ބަޔަކު ކުރި މުޒާހަރާތަކުގެ ތެރޭގައި ވެރިކަމާއި ހަވާލުވެވަޑައިގެންނެވި މަޝްހޫރު އިކޮނޮމިސްޓް ޔޫނުސް ވަނީ ބައިމަދު މީހުންގެ ހައްގުތައް ރައްކާތެރިކޮށް، އޭނާގެ ވެރިކަމުގައި ބޯޑަރ ސެކިއުރިޓީއާއި އިންސާޞި ހައްގުތައް ހިމާޔަތްކޮށް ކުރިން ހިންގާފައިވާ ކޮރަޕްޝަންތައް ބަލައި އިންސާފު ގާއިމް ކުރައްވާނެ ކަމަށް ވިދާޅުވެފައެވެ.
