މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މި އަހަރުގެ ފުރަތަމަ ތިން މަސް ދުވަހުގެ ތެރޭގައި މަސްވެރިންނަށް 379 މިލިއަން ރުފިޔާ ދޫކޮށްފިއެވެ. މިއީ ރައީސްގެ ވަޢުދުފުޅައި އެއްގޮތަށް 48 ގަޑިއިރުތެރޭ ފައިސާ ދޫކުރުމުގެ އުޞޫލުގެ ތެރެއިން ދޫކޮށްފައިވާ ފައިސާއެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވައުދުވެވަޑައިގެންނެވި ގޮތަށް މިފްކޯއިން ވަނީ މިދިޔަ އަހަރުގެ މަސްވެރިންގެ ދުވަހުން ފެށިގެން މަސްވެރިން ކިރުވާ މަހަށް 48 ގަޑިއިރުގެ ފައިސާ ދެއްކުމުގެ ސިޔާސަތެއް ތަޢާރަފް ކޮށްފައެވެ.
މިއަށް އަމަލުކުރަން ފެށިފަހުން މަސްވެރިންނަށް ޖުމްލަ 409.1 މިލިއަން ރުފިޔާ ދީފައިވާ ކަމަށް މިފްކޯގެ ތަފާސް ހިސާބުތަކުން ދައްކައެވެ. މިއީ މަސްވެރިން ބޭނި މަސް ކިރުވުމަށްފަހު 48 ގަޑިއިރުތެރޭ މިހާތަނަށް ދޫކުރި ފައިސާގެ ޢަދަދެވެ.
މަސްވެރިން ކިރުވި މަހުގެތެރެއިން، ޖެނުއަރީ މަހު 177 މިލިއަން ރުފިޔާ، ފެބްރުއަރީ މަހު 120 މިލިއަން ރުފިޔާ، އަދި މާޗް މަހު 81.9 މިލިއަން ރުފިޔާ ދޫކޮށްފައި ވެއެވެ.
މިފްކޯގެ ޕޭމަންޓް ސިސްޓަމް ހިންގަނީ ބޭންކް އޮފް މޯލްޑިވްސް އާއި ފިނޭންސް މިނިސްޓްރީއާ އެކު ވެފައިވާ އެއްބަސްވުމެއްގެ ދަށުންނެވެ.
ފަހުގެ ތާރީހުގައި ދުވާލަކު އެންމެ ގިނައިން މަސް ކިރުވިކަމަށް ރެކޯޑް ކުރެވިފައިވަނީ މިދިޔަ އަހަރުގެ ފެބްރުއަރީ މަހުގެ 12 ވަނަ ދުވަހު ކަމަށްވާއިރު، 546 ޓަނުގެ މަސް އެދުވަހުކިރާފައި ވެއެވެ. އެދުވަހު މިފްކޯއިން ވަނީ 48 މަސްދޯންޏަކަށް 7.6 މިލިއަން ރުފިޔާ ދީފައެވެ.
މަސްވެރިކަމުގެ ދާއިރާ އިތުރަށް ފުޅާކޮށް، ސިނާއަތުގެ ގޮންޖެހުންތައް ތިން އަހަރު ދުވަހުގެ ތެރޭގައި ހައްލުކޮށް، މަސްވެރިކަމަކީ އާމްދަނީގެ ބޮޑު މަސްދަރަކަށް ހެދުމަށް ސަރުކާރުން ދަނީ މަސައްކަތް ކުރަމުންނެވެ.
