"ހޮޅުދޫ ބޯޓު" ނަމަކަށް ކިޔާ މުދާ އުފުލާ ބޯޓެއްގައި ރޯވި ހާދިސާގައި ފިހުނު ދެ މީހުންނަށް އިތުރު ފަރުވާދޭން ކުޑަހުވަދޫއަށް ގެންދިއުމަށް ނިންމައިފިއެވެ.
އެ ދެމީހުން ކުޑަހުވަދޫއަށް ގެންދިއުމަށް ނިންމާފައިވަނީ ކަނޑޫދޫ ހެލްތު ސެންޓަރުން ފަރުވާ ދިނުމަށް ފަހުއެވެ.
ކަނޑޫދޫ ހެލްތު ސެންޓަރުން ބުނީ ހޮޅުދޫ ބޯޓުގައި ރޯވި ހާދިސާއާ ގުޅިގެން ފަރުވާދެމުން އަންނަނީ ދިވެއްސަކާއި ބިދޭސީއަކަށް ކަމަށެވެ. އަދި އެ ދެމީހުންނަށް ވެސް ހާދިސާގެ ސަބަބުން ވަރަށް ބޮޑު ޝޮކެއް ލިބިފައިވާކަމަށް ހެލްތު ސެންޓަރުން ބުންޏެވެ.
އެމްއެންޑީއެފް އިން ބުނީ އެ ބޯޓުން ދަތުރުކުރަމުންދިޔަ 18 މީހުންގެ ތެރެއިން 17 މީހުން ވަނީ ސަލާމަތްކޮށްފައި ކަމަށެވެ. އަދި ލ.މާވަށު، އުމުރުން 25 އަހަރުގެ ޢަލީ މުޝްފިޤް ހޯދުމުގެ މަސައްކަތުގައި އެމްއެންޑީއެފް ސެންޓްރަލް އޭރިއާ ކޮމާންޑް ކޯސްޓްގާޑާއި އެ ސަރަޙައްދުގެ ގިނަ އުޅަނދުތަކެއް ހަރަކާތްތެރިވަމުން އަންނަ ކަމަށް އެމްއެންޑީއެފް އިން ބުންޏެވެ.
މި ހާދިސާގައި އަލިފާން ރޯވި ބޯޓު އަޑިއަށް ގޮސްފައިވަނީ ދަންވަރު 02:07 ހާއިރު ކަމަށް އެމްއެންޑީއެފް އިން ބުނެފައިވެއެވެ.
