ގެއްލިގެން ހޯދާ ކަމަށް ބުނެ މި މަހުގެ 11 ވަނަ ދުވަހު ފުލުހުން އިޢުލާންކުރި ނ. މަނަދޫ އަބްދުﷲ ޝިހާދު (37 އަހަރު) ރާއްޖެއިން ބޭރުގައި އުޅުމަށްފަހު ރާއްޖެ އައުމާއެކު ޑުރަގާއެކު ހައްޔަރު ކޮށްފިއެވެ.
ފުލުހުންގެ ބެލުމުގެ ދަށަށް އޭނާ ގެންދިޔައީ އިއްޔެގެ ވަގުތެއްގައެވެ.
ކްރިމިނަލް ކޯޓުން އިއްޔެ ވަނީ އޭނާގެ ބަންދަށް 10 ދުވަސް ދީފައެވެ. ކޯޓު އަމުރުގައިވާ ގޮތުން، އޭނާ ހައްޔަރުކޮށްފައިވަނީ މަސްތުވާތަކެތި އެތެރެކުރުމާއި އޭގެ ވިޔަފާރިކުރާ ކަމުގެ ތުހުމަތުގައެވެ. ނަމަވެސް، އޭނާ ހައްޔަރުކުރީ ރާއްޖެއިން ބޭރުން އައުމާ އެކުގައިކަން ނުވަތަ ނޫންކަން އަދި ސާފުވެފައެއް ނުވެއެވެ.
މި މަހުގެ 11 ވަނަ ދުވަހު ފުލުހުން ވަނީ ޝިހާދު ގެއްލިގެން ހޯދަން ސޯޝަލް މީޑިއާގައި އިޢުލާނުކޮށްފައެވެ. ފުލުހުން އޭނާ ހޯދަން އިޢުލާނުކުރީ، އާއިލާއަށް އޭނާގެ ޚަބަރެއް ނުވާތީ، ފުލުހުންނަށް އެކަން ރިޕޯޓުކުރުމުންނެވެ. އާއިލާއާއި ހަވާލާދީ އޭރު ފުލުހުން ބުނެފައިވަނީ، އޭނާއަކީ މާލޭގައި ދިރިއުޅޭ މީހެއް ކަމަށާއި، އެހެންނަމަވެސް އޭނާގެ ފޯނަށްވެސް ނުގުޅޭ ކަމަށެވެ.
