ޔުއެފާ ނޭޝަންސް ލީގުގެ ކުއާޓަރ ފައިނަލްގެ ފުރަތަމަ މެޗުގައި ޑެންމާކާއި ދެކޮޅަށް ރޭ ކުޅުނު މެޗުގައި ޕޯޗުގަލް ވަނީ 1-0 އިން ބަލިވެފައެވެ. މި މެޗަށް ފަހު ޕޯޗުގަލްގެ ކޯޗު ރޮބަޓޯ މާޓިނެޒް ވަނީ މިއީ ޕޯޗުގަލްގެ ޤައުމީ ޓީމުގެ ފަރާތުން ދެ އަހަރުގެ ތެރޭގައި ފެނުނު އެންމެ ދެރަ ކުޅުން ކަމަށް ބުނެފައެވެ.
ޑެންމާކުގެ ވެރިރަށް ކޯޕެންހޭގަންގެ ޕާކެން ސްޓޭޑިއަމްގައި ކުޅުނު މި މެޗުގައި ޕޯޗުގަލްގެ ޓީމަށް ވަނީ ގޯލު ޖެހުމުގައި ވަރަށް ބޮޑަށް އުނދަގޫވެފައެވެ. މެޗުގެ ފަހު ވަގުތުތަކުގައި ރަސްމުސް ހޯލަންޑް ޖެހި ގޯލުން ޑެންމާކަށް ވަނީ ލީޑު ލިބިފައެވެ.
މެޗުގައި ޑެންމާކުން ޖުމުލަ 23 ފަހަރު ގޯލަށް ޝޫޓު ކުރިއެވެ. އޭގެ ތެރެއިން 9 ޝޫޓު ދިޔައީ ގޯލާއި އަމާޒަށެވެ. ނަމަވެސް ޕޯޗުގަލްގެ ގޯލްކީޕަރު ޑިއޯގޯ ކޮސްޓާގެ މޮޅު ކުޅުމުން އެ ބޯޅަތައް މަތަކުރިތަން ފެނުނެވެ.
މެޗުގެ ފުރަތަމަ ހާފުގައި ޕޯޗުގަލްގެ ވެއިގާގެ އަތުގައި ބޯޅަ ޖެހުމުން ޑެންމާކަށް ޕެނަލްޓީ އެއްވެސް ލިބުނެވެ. އެއާއެކު ދެން ފެނުނީ ކެޕްޓަން ރޮނާލްޑޯ ކޮސްޓާއާއި ވާހަކަދެއްކި މަންޒަރެވެ. ދެން ފެނުނީ އެރިކްސަން ފޮނުވާލި ބޯޅަ ޑިއޭގޯ ކޮސްޓާ ވަރަށް ފުރިހަމައަށް ސޭވް ކުރި މަންޒަރެވެ.
އެރިކްސަން ޕެނަލްޓި ފޮނުވާލުމުގެ ކުރިން ކެޕްޓަން ރޮނާލްޑޯ ކީޕަރު ޑިއޭގޯ ކޮސްޓާއާއި ވާހަކަ ދައްކަނޯ
އެރިކްސަންގެ ޕެނަލްޓީ ޑިއޭގޯ ކޮސްޓަ ސޭވްކުރަނީ
މެޗަށް ފަހު ޕޯޗުގަލްގެ ކޯޗް މާޓިނެޒް ބުނީ ފާއިތުވި ދެ އަހަރުގެ ތެރޭގައި އެންމެ ދެރަ ކުޅުން ފެނުނު މެޗަކީ މިއީ ކަމަށާއި މެޗުގައި ކުރަންޖެހޭ ކަންތައްތައް ނުކުރެވުމުގެ ސަބަބުން ޑެންމާކުގެ ޕްރެޝަރުތަކާއި ކުރިމަތިލާން ޖެހުނު ކަމަށެވެ. އަދި ފަސް މަސް ދުވަހުގެ ޗުއްޓީއަކަށްފަހު ބޭނުންވާ ވަރުގެ ޕާފޯމެންސެއް ނުދެއްކުނު ކަމަށްވެސް ބުންޏެވެ.
ޕޯޗުގަލްގެ މިޑްފީލްޑަރު ބްރޫނޯ ފެނާންޑޭސް ބުނީ މި ނަތީޖާއަކީ ދެވަނަ ލެގުގައި ރަނގަޅު ކުރަންޖެހޭ ކަންތައްތަކުގެ ފިލާވަޅެއް ކަމަށެވެ. އޭނާ ބުނީ، ޓީމަކީ ތަޖުރިބާކާރު އަދި ޒުވާން ޓީމެއް ކަމަށާއި، މިއީ ކަންބޮޑުވާންޖެހޭ ކަމެއް ނޫނެވެ. އަދި ދެން އޮތް މެޗުގައި ތަފާތުކޮށް ކުރަންޖެހޭ ކަންތައްތަކުގެ ފިލާވަޅެއް ލިބިފައިވާ ކަމަށެވެ.
.ނޭޝަންސް ލީގުގެ ކުއާޓަރ ފައިނަލްގެ ދެވަނަ ލެގު ކުޅޭނީ އާދީއްތަ ދުވަހުއެވެ. މި މެޗުގައި ޕޯޗުގަލްގެ ޓީމަށް ޑެންމާކާ ދެކޮޅަށް ކާމިޔާބު ހޯދައި، ސެމީ ފައިނަލަށް ދިއުމުގެ ފުރުޞަތު އޮތް ކަމަށް ކޯޗު މާޓިނެޒް ފާހަގަކޮށްފައިވެއެވެ.
މެޗުގެ ތަފާސްހިސާބުތަކަށް ބަލާއިރު، ޕޯޗުގަލްގެ ޓީމުން ވަނީ ގިނަ ވަގުތު ބޯޅަ ކޮންޓްރޯލް ކޮށްފައެވެ.
ޕޯޗުގަލަށް ނޭޝަންސް ލީގުގެ ކުއާޓަރ ފައިނަލްގެ ދެވަނަ ލެގުގައި ކާމިޔާބު ހޯދައި، ސެމީ ފައިނަލަށް ދެވޭނީ މަދުވެގެން ދެ ގޯލުން މެޗު ކާމިޔާބުކޮށްގެންނެވެ. މި މެޗު ކުޅޭނީ ޕޯޗުގަލްގެ ވެރިރަށް ލިސްބަންގައެވެ.
