މިއަދު ހަވީރުން ފެށިގެން މާލެ ސަރަހައްދުގައި ވެހިކަލް ދުއްވުން މަނާ ވަގުތުތައް ކަނޑައަޅާފައި އޮތް އިޢުލާން ޓްރާންސްޕޯޓް މިނިސްޓްރީން ބާޠިލުކޮށްފިއެވެ.
މިނިސްޓްރީން އެކްސްގައި ހިއްސާކުރި ޕޯސްޓެއްގައި ބުނެފައިވަނީ، ފިޠުރު ޢީދު ދުވަހު ގްރޭޓަރ މާލޭ ސަރަހައްދުގައި އިންޖީނުލީ އެއްގަމު އުޅަނދު ދުއްވުން މަނާ ވަގުތު ކަނޑައެޅުމާ ގުޅޭ ގޮތުން ކުރި އިޢުލާން ބާޠިލުކޮށްފައިވާ ކަމަށެވެ.
ކުރިން ކުރި އިޢުލާނުގައިވާ ގޮތުން މިއަދު ހަވީރު 4:00 އިން 6:00 އަށް އިންޖީނުލީ އެއްވެސް އުޅަނދެއްގައި ދަތުރެއް ނުކުރެވޭނެ ކަމަށާއި، ހަވީރު 4:00 އިން ރޭގަނޑު 11:30 އާ ދެމެދު މާލެ ސަރަހައްދުގައި ބަރު އުޅަނދު ދުއްވުން ވެސް މަނާކޮށްފައިވާ ކަމަށް ބުނެފައިވެއެވެ. ނަމަވެސް، މި އެންގުން ބާޠިލުކޮށްފައިވަނީ އެއަށް ޢަމަލުކުރަން ފެށިތާ ގާތްގަނޑަކަށް ގަޑިއެއްހާއިރު ފަހުންނެވެ.
މި އިޢުލާން ބާޠިލުކުރި އިރު، މާލޭގައި ޢީދު ފާހަގަކުރުމަށް ޚާއްޞަ ގިނަ ހަރަކާތްތަކެއް ކުރިއަށްދެއެވެ. އެމްއެންޑީއެފް އާއި ސަރުކާރު ހިއްސާވާ ބައެއް ކުންފުނިތައް ގުޅިގެން "ޢީދު ހަވީރު" ގެ ނަމުގައި ބާއްވާ މި ހަރަކާތްތައް ކުރިއަށްދަނީ ސަލްޓަން ޕާކުން ފެށިގެން އިސްލާމީ މަރުކަޒުގެ މައިދާނާއި ޖުމްހޫރ މައިދާނާއި ރަސްމީ ބޮޑު ފާލަމުގެ ސަރަހައްދުގައެވެ. މި ސަރަހައްދުގައި އޮތް ހަރަކާތްތަކަށް ރައީސުލްޖުމްހޫރިއްޔާ މުޙައްމަދު މުޢިއްޒު ވެސް ވަނީ ޒިޔާރަތްކުރައްވާފައެވެ.