ނ. ވެލިދޫއަށް މިރޭ ނަގޫރޯޅިއެއް އަރައި 3 މީހަކަށް އަނިޔާ ވެއްޖެއެވެ.
އަނިޔާވި 3 މީހުންނަށް އިތުރު ފަރުވާއަށް އުނގޫފާރަށް ގެންދިޔުމަށް މަސައްކަތް ކުރަމުންދާ ކަމަށާއި އެއީ ދެއަންހެނުންނާއި ފިރިހެނެއް ކަމަށް އެ ރަށު ކައުންސިލްގެ ރައީސް އާތިފް ހުސައިން ވިދާޅުވިއެވެ.
އޭނާ ވިދާޅުވީ، ނަގޫރޯޅި އަރާފައި ވަނީ މިރޭ 10:20 ހާއިރު ކަމަށާއި، އެ ނަގޫރޯޅިއާ އެކު އާރްޑީސީގެ ފުރާޅު އެއްލާލާފައިވާ ކަމަށެވެ. “ނަގޫރޯޅީގެ ބާރު ގަދަކަމުން އާރުޑީސީގެ ފުރާޅު ވަރަށް ދުރަށް އެއްލައިލި، ސައިޓުގައި ހުރި ހޮޅިތަކެއް ވެސް ވިއްސައިގެން ގޮސްފައިވޭ. މިކަމުގައި 3 މީހުންނަށް ލިބުނު ޒަހަމްތަކަށް ފަރުވާ ދިނުމަށްފަހު މިހާރު އިތުރު ފަރުވާއަށް އުނގޫފާރަށް ގެންދަނީ”
މި ވަގުތު ރަށުގެ ކައުންސިލާއި އާންމު ރައްޔިތުން އަންނަނީ އާރްޑީސީގެ ފުރާޅު އެއްލާލި ސަރަހައްދުގައި ހަރަކާތްތެރިވަމުންނެވެ.
