ބ. މާރިކިލުގައި ހިންގި މަސްތުވާތަކެތީގެ އޮޕަރޭޝަނެއްގައި ނުވަ މީހުން ހައްޔަރުކޮށްފި ކަމަށް މޯލްޑިވްސް ޕޮލިސް ސާވިސް އިން ބުނެފިއެވެ. މި އޮޕަރޭޝަން ހިންގާފައިވަނީ މިދިޔަ ހޮނިހިރު ދުވަހުއެވެ.
މި މައްސަލައިގައި 3 ދިވެހިން ހައްޔަރުކުރިއިރު އޭގެ ތެރޭގައި އަންހެނަކު ވެސް ހިމެނެއެވެ. ދެން ތިބީ މުޅިން ވެސް ބިދޭސީންނެވެ.
މި މައްސަލައިގައި ފުލުހުން ހައްޔަރުކުރި 9 މީހުން:
1. އަލްޙާން ރަޝީދު ޙުސައިން (49އ) - މ. ޖަވާހިރުވާދީ، މާލެ
2. މަރްޔަމް ރިފާޢު (25އ) - ޏ. ފުވައްމުލައް / ދިގުވާނޑު، ހޮލެންޑް
3. ޢަބްދުލް މުޙްސިން ޙަސަން (65އ) - ރ. އިނގުރައިދޫ / ވަފާ
4. ކުމަރެސަން ޗިންނައިއަ (20އ) - އިންޑިއާ
5. ދިނޭޝް ސައްމިޔައްޕަން (29އ) - އިންޑިއާ
6. އެލަވެންޑަން ސިވަގުނަނަ ސަންޑަރަމް (39އ) - ސްރީލަންކާ
7. ކަނަގަރާޖު ޕޮންނައްޔަ ސުޕައްޔަ (46އ) - ސްރީލަންކާ
8. މުޙައްމަދު މައްސޫދު (46އ) - ބަނގުލަދޭޝް
9. ސަބެޝަން ނަހާރަޖަ (31އ) - ސްރީލަންކާ
ފުލުހުން ބުނީ މި އޮޕަރޭޝަނުގައި 162 ދަޅު ބަނގުރަލާއި 5 ފުޅި ބަނގުރަލާއި މަސްތުވާތަކެތި ކަމަށް ބެލެވޭ 12.8 ގުރާމްގެ ތަކެތި ފެނިފައިވާ ކަމަށެވެ.
މި މައްސަލައިގައި 65 އަހަރުގެ މީހާ ކޯޓުން ޝަރުތުކުރުމަށްފަހު ދޫކޮށްލާފައި ވާއިރު، ދެން ތިބި 8 މީހުން 15 ދުވަހަށް ބަންދުކުރުމަށް ކޯޓުން އަމުރު ކުރިއެވެ.
މި އޮޕަރޭޝަން ހިންގާފައިވަނީ ކައުންޓަރ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓު އަދި ބ. އަތޮޅު ފުލުހުން ގުޅިގެންނެވެ.
