ރޭ ސަފާރީއަކުން ވެއްޓިގެން ގެއްލުނު މީހާ މަރުވެފައި އޮއްވައި މިއަދު ފެނިއްޖެއެވެ. ގެއްލިގެން ހޯދަމުންދިޔަ މީހާއަކީ ނ. ހޮޅުދޫ، ސީވީޑް، އަލީ އަރުޝަދު (35އ) އެވެ.
އެމްއެންޑީއެފުން މަޢުލޫމާތު ދިންގޮތުގައި އަރުޝަދުގެ ހަށިގަނޑު ހޯދާފައިވަނީ އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ޑައިވަރުންނެވެ. އޭނާގެ ހަށިގަނޑު ފެނިފައިވަނީ ކަނޑުގެ 69 މީޓަރު އަޑިންނެވެ. ޑައިވަރުން އަރުޝަދުގެ ހަށިގަނޑު މެންދުރު ފަހު 15:35 އެހާކަންހާއިރު ލޯންޗަށް ނަގާފައިވާ ކަމަށްވެސް އެމްއެންޑީއެފުން ބުނެފައިވެއެވެ.
ފުލުހުން ކުރިން ދިން މަޢުލޫމާތުގައިވާ ގޮތުން، އަރުޝަދު ވެއްޓިފައިވަނީ ރޭގެ ވަގުތެއްގައި ސަފާރީގެ ޑެކް މަތީ ހުއްޓައެވެ. އޭނާ އަރިމަތީ ޑެކްގައި ޖެހި މޫދަށް ވެއްޓިފައިވާކަން ސީސީޓީވީ ކެމެރާ ފުޓޭޖުން އެނގޭ ކަމަށް ފުލުހުން ބުނެފައިވެއެވެ.
ފުލުހުންނާއި ސިފައިން ގުޅިގެން އަރުޝަދު ހޯދުމުގެ މަސައްކަތް ފެށީ މިއަދުއެވެ. ފުލުހުން މިހާރު ވަނީ އަރުޝަދުގެ ހަށިގަނޑު ހޮސްޕިޓަލަށް ގެންދިއުމުގެ މަސައްކަތް ފަށާފައެވެ.
ފާހަގަކޮށްލަން ޖެހޭ ކަމަކީ މިއަދު އދ. އަތޮޅުގެ ރިސޯޓެއްގައި ޗުއްޓީ ހޭދަކުރަމުންދިޔަ އާޖެންޓީނާގެ 55 އަހަރުގެ ފިރިހެން ފަތުރުވެރިޔަކު ވެސް، ރެޑިސަން ބްލޫ މޯލްޑިވްސް ރިސޯޓުގެ ބޭރު މޫދުގައި އުޅެނިކޮށް ލޯންޗަކުން ޖެހި ވަނީ މަރުވެފައެވެ.
