ޕާސްޕޯޓަށް އެދި ހުށަހަޅާ ފޮޓޯތަކުގައި އާންމުކޮށް ދިމާވާ މައްސަލަތައް ހައްލުކުރުމަށް މޯލްޑިވްސް އިމިގްރޭޝަނުން ފޮޓޯ ސްޓޫޑިއޯތަކާއެކު ބައްދަލުވުމެއް ބާއްވައިފިއެވެ.
މޯލްޑިވްސް އިމިގްރޭޝަނުން ބުނީ، މި ބައްދަލުވުން ބޭއްވުނީ ބުރާސްފަތި ދުވަހު ޕާސްޕޯޓު ސެކްޝަންގެ މުވައްޒަފުންނާއި ފޮޓޯ ސްޓޫޑިއޯތަކުގެ ވެރިންނާ ދެމެދުގައިކަމަށެވެ. މި ބައްދަލުވުމުގެ މައިގަނޑު މަޤްޞަދަކީ ޕާސްޕޯޓު ފޮޓޯ ނެގުމުގައި ކަނޑައެޅިފައިވާ މިންގަނޑުތަކާ އެއްގޮތަށް ޢަމަލުކުރުމަށް ބާރުއެޅުންކަމަށް އިމިގްރޭޝަނުން ބުންޏެވެ.
މި ބައްދަލުވުމުގައި ޕާސްޕޯޓު ފޮޓޯ ނެގުމުގައި ގެންގުޅެންޖެހޭ މިންގަނޑުތަކާއި، އާންމުކޮށް ދިމާވާ މައްސަލަތަކާ ބެހޭގޮތުން މަޝްވަރާކުރެވުނު ކަމަށާއި މި މައްސަލަތައް ހައްލުކުރުމަށް އަޅަންޖެހޭ ފިޔަވަޅުތަކާ ބެހޭގޮތުން ވެސް މަޝްވަރާކުރެވުނުކަމަށް އިމިގްރޭޝަނުން ބުންޏެވެ.
ފާހަގަކޮށްލެވޭ ކަމަކީ، ދިވެހިރާއްޖޭގެ ޕާސްޕޯޓު ވަނީ ފަހަކަށް އައިސް ދުނިޔޭގެ ޕާސްޕޯޓު ރޭންކިންގައި އިތުރަށް ވަރުގަދަވެފައެވެ. މިހާރު ދިވެހި ޕާސްޕޯޓަކީ ދެކުނު އޭޝިއާގެ ސަރަހައްދުގައި އެންމެ ބާރުގަދަ ޕާސްޕޯޓެވެ. މިކަމަކީ ދިވެހި ރައްޔިތުންނަށް ދުނިޔޭގެ ގިނަ ޤައުމުތަކަށް ފަސޭހައިން ދަތުރުކުރުމުގެ ފުރުޞަތު ލިބިދޭ ކަމެކެވެ.
