އިންޑިއާއިން ރާއްޖެއަށް ކަނޑައެޅި އާ ސަފީރު ޖީ ބާލާސުބްރަމާނިއަމް ސަފީރުކަމުގެ ފަތްކޮޅު ރައީސް ޑރ. މުހައްމަދު މުއިއްޒަށް މިއަދު އަރުވައިފި އެވެ.
އިންޑިއާގެ ހައި ކޮމިޝަނަރު، ޖީ ބާލާސުބްރަމާނިއަމް ސަފީރުކަމުގެ ފަތްކޮޅު ރައީސަށް އެރުވުމަށް ރައީސް އޮފީހުގައި މިއަދު ހެނދުނު ހާއްސަ ރަސްމިއްޔާތެއް ބޭއްވި އެވެ.
ރައީސް އޮފީހުން ވަނީ އަލަށް ވަޑައިގަންނަވާ ބޭރުގެ ސަފީރުންނަށް ދިވެހި ސަރުކާރުން އަރުވާ ރަސްމީ އިއްޒަތުގައި ޖީ ބާލާސުބްރަމާނިއަމްއަށް ވެސް މަރުހަބާ ކިޔައިފަ އެވެ.
އެ ރަސްމިއްޔާތުގައި ޖީ ބާލާސުބްރަމާނިއަމް ވަނީ އިންޑިއާގެ ބޮޑު ވަޒީރު ނަރެންދުރަ މޯދީ އާއި އެ ގައުމުގެ އެކްސްޓާނަލް އެފެއާޒް މިނިސްޓަރު ޑޜ. އެސް ޖައިޝަންކަރު ފަރާތުން ރައީސް ޑރ. މުއިއްޒަށް މަރުހަބާ ވިދާޅުވެފަ އެވެ. އަދި ދެ ގައުމު ގުޅުން އިތުރަށް ވަރުގަދަކުރުމާއި އިންޑިއާގެ އެހީގައި ރާއްޖޭގައި ހިންގަމުން އަންނަ މަޝްރޫއުތަކާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.
ނައިޖީރިއާގެ ސަފީރުކަން ވެސް ކުރިން ކުރެއްވި ޖީ ބާލާސުބްރަމާނިއަމް އަކީ 1998 ވަނަ އަހަރުން ފެށިގެން އިންޑިއާގެ ހާރިޖީ ދާއިރާގައި މަސައްކަތް ކުރައްވަމުން އަންނަ ބޭފުޅެކެވެ.
އިންޑިއާއިން ރާއްޖެއަށް އާ ސަފީރެއް ކަނޑައެޅީ އެ މަގާމުގައި ކުރިން ހުންނެވި މުނޫ މަހާވަރުގެ ތިން އަހަރުގެ ދައުރު މިދިޔަ މަހު ހަމަވުންނެވެ.
