ގދ. ފިޔޯރީގައި މަސް ބަންދުކުރާ ބޮޑު ކާރުޚާނާއެއް ޤާއިމުކުރުމަށް ޗައިނާގެ ކުންފުންޏަކާއެކު ވެވޭ އެއްބަސްވުމުގައި މިއަންނަ ފެބްރުއަރީ މަހު ސޮއިކުރުމަށް ނިންމާފައިވާ ކަމަށް މިހާރު ފިޔޯރީގައި ހުންނެވި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ވިދާޅުވި ގޮތުގައި، މި ކާރުޚާނާއަކީ 3000 ޓަނުގެ ޖާގައިގެ ފެކްޓަރީއެކެވެ. މި ފެކްޓަރީގައި ދުވާލަކު 100 ޓަނުގެ މަސްދަޅު އުފެއްދޭނެއެވެ. އަދި 3000 ޓަނުގެ މަސް ފިނިކުރުމުގެ ޤާބިލުކަން ލިބިގެންދާނެއެވެ. މީގެ އިތުރުން، ދުވާލަކު 100 ޓަނުގެ ފިޝްމީލް ވެސް އުފެއްދޭނެއެވެ.
"ފެބްރުއަރީގައި އެގްރީމެންޓުގައި ސޮއިކުރެވި، އޭގެ ދެމަސް ފަހުން ޢަމަލީ މަސައްކަތް ފެށޭނެ. މީގެ ނަތީޖާއަކަށް ވެގެންދާނީ މަސްވެރިކަމަށް ބޮޑު ކުރިއެރުމެއް ލިބުން،" ރައީސް ވިދާޅުވިއެވެ.
މި މަޝްރޫޢަކީ ރާއްޖޭގެ 3 ސަރަހައްދެއްގައި މަސް ބަންދުކުރާ ކާރުޚާނާ ޤާއިމްކުރުމަށް ޗައިނާގެ ކުންފުންޏަކާއެކު ވެފައިވާ އެއްބަސްވުމުގެ ބައެކެވެ.
ފިޔޯރީގެ މި މަޝްރޫޢަށް 50 ނުވަތަ 75 މިލިއަން ޑޮލަރު ޚަރަދުވާނެކަމަށް ލަފާކުރެވެއެވެ. މި ކާރުޚާނާ ޤާއިމުކުރުމުން، ރާއްޖޭގައި މަސް ބަންދުކުރުމަށް ހުރި ޖާގައިގެ ދަތިކަން ޙައްލުވެ، މަސްވެރިކަމުގެ ސިނާޢަތަށް ބޮޑު ކުރިއެރުމެއް ލިބިގެންދާނެއެވެ.
