އަންނަ ރޯދަ މަހަށް ކަރަންޓުގެ މައްސަލަތައް ޙައްލުކުރުމަށް ޖަނަރޭޓަރުތައް ގެނެސް އިންސްޓޯލްކުރާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހުވަދޫ އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި ގދ. ފިޔޯރީއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވުމަށް މިރޭ ބޭއްވި ޖަލްސާގައި ވާހަކަފުޅުދައްކަވަމުންނެވެ.
ރައީސް ވިދާޅުވީ ކުރިއަށް އޮތީ ރޯދަ މަސް ކަމުން ކަރަންޓުގެ މައްސަލައަށް ޙައްލުގެނެސްދިނުމަށް މި ސަރުކާރުން ވަރަށް ޚާއްސަ އިސްކަމެއް ދެއްވާ ކަމަށެވެ. މިއީ ވަރަށް ގިނަ ރަށްތަކުގައި ބޮޑުވެފައި އޮތް މައްސަލައެއްކަން ފާހަގަކުރައްވާ ރައީސް ވިދާޅުވީ ފެނަކައިގެން އިންޖީނުގެތަކުގެ ޖަނަރޭޓަރުތައް ވަނީ ހަލާކުވެފައި ނުވަތަ ކެޕޭސިޓީ އިތުރުކުރަން ޖެހިފައި ކަމަށެވެ.
ރައީސް ވިދާޅުވީ މި މައްސަލަ ޙައްލުކުރުމަށްޓަކައި މިދިޔަ އަހަރު ވަރަށް ބޮޑު ހޭދައެއް ކުރަން ޖެހުނު ކަމަށާއި، މި ސަރުކާރު ވެރިކަމާ ޙަވާލުވިއިރު، އިންޖީނުގެތައް ރަނގަޅަށް ނުބަލަހައްޓާތާ އެތައް އަހަރެއް ވެފައި ހުރިކަމަށެވެ. އެ މައްސަލަ ޙައްލުކުރުމަށް މިހާރު ޚާއްސަ މަސައްކަތްތަކެއް ފަށައިގެން ކުރަމުން އަންނަ ކަމަށް ރައީސް ވިދާޅުވިއެވެ.
"މިހާރު އަޅުގަނޑުމެން ޚާއްސަ މަސައްކަތްތަކެއް ފަށައިފިން ފިނޭންސް މިނިސްޓްރީއާއި ފެނަކައާއި އެސްޓީއޯ، އެމްޓީސީސީ ފަދަ ކުންފުނިތައް ގުޅި، ކުރިއަށް އޮތް ރޯދަމަސް އަންނަން ވާއިރަށް އަޅުގަނޑުމެން މި އަމާޒުކުރަނީ މުޅި ރާއްޖޭގައި، އެންމެ ރަށެއްވެސް ހަމަ މައްސަލައެއް އޮތް ރަށެއް ވިއްޔާ ހަމަ ހިމެނޭގޮތަށް އެންމެ ރަށެއްވެސް ދޫކޮށް ނުލާ ހުރިހާ ރަށެއްގައި ޖަނަރޭޓަރުތަކުގެ މައްސަލަ ޙައްލުކުރުމަށް ގެންނަން ޖެހޭ ޖެނެރޭޓަރުތައް ގެނެސްދީ، އިންސްޓޯލްކޮށް ނިންމަން." ރައީސް ވިދާޅުވިއެވެ.
ރައީސް ވިދާޅުވީ މި މަސައްކަތަކީ ވަރަށް ބޮޑު ޗެލެންޖަކަށް ވާނެ ނަމަވެސް އެ މަސައްކަތް ވެސް ފަށާފައިވާ ކަމަށެވެ. އަދި ރޯދަ މަހު ކަރަންޓުގެ މައްސަލައާ ހެދީ ރަށްރަށުގެ ރައްޔިތުން ކަންބޮޑުނުވާ މިންވަރަށް އެކަން ޙައްލުކޮށްދިނުމަށް މި ސަރުކާރުން އަމާޒު ހިފާފައިވާ ކަމަށް ރައީސް ވިދާޅުވިއެވެ.
