ރާއްޖޭގެ ހުރިހާ ރަށެއްގައި ވެސް އެ ރަށެއްގެ އާބާދީއަށް އެންމެ އެކަށީގެންވާ ކުނި މެނޭޖްކުރާ ނިޒާމް މި އަހަރު ޤާއިމްކުރެވިގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހުވަދޫ އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި ގދ. ފިޔޯރީއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވުމަށް މިރޭ ބޭއްވި ޖަލްސާގައެވެ.
ރައީސް ވިދާޅުވީ ކުނި މެނޭޖްކުރުމުގެ ނިޒާމަކީ ކޮންމެ ރަށެއްގައި ވެސް މި އަހަރުގެ ތެރޭގައި ކުރުމަށް ނިންމާފައިވާ ވަރަށް މުހިންމު ކަމެއް ކަމަށާއި ސަރުކާރުގެ އަމާޒަކީ މި އަހަރުގެ ނިޔަލަށް ރާއްޖޭގެ ކޮންމެ ރަށެއްގައިވެސް އެ ރަށެއްގެ ނިސްބަތުން ކުނި މެނޭޖްކުރެވޭ ނިޒާމް ޤާއިމްކުރުން ކަމަށެވެ.
ރައީސް ވިދާޅުވީ މިއީ ވަރަށް ބޮޑު މަސައްކަތެއް އަދި ވަރަށް ގިނަ ޒަމާންތަކެއް ވަންދެން ޙައްލުނުވެ އޮތް މައްސަލައެއް ކަމަށެވެ. ނަމަވެސް އެ މައްސަލަ ޙައްލުކުރުމަށް މި ސަރުކާރުން ކަނޑައަޅާފައިވަނީ ވަރަށް އުންމީދީ ޓާގެޓެއް ކަމަށާއި އެ ޓާގެޓް ޙާސިލްކުރާނެ ކަމަށް ރައީސް ވިދާޅުވިއެވެ.
"މި އަހަރު ނިމުމުގެ ކުރީގައި މި ރަށް ހިމެނޭހެން ރާއްޖޭގެ ހުރިހާ ރަށެއްގައި، އެރަށެއްގެ އާބާދީގެ ނިސްބަތުން ޤާއިމްކުރަން ޖެހޭ ފެންވަރުގެ އަދި އެރަށެއްގެ ދެން ހުރި ސިނާއަތްތަކާއި، ހިނގާ މަސައްކަތްތަކާއި، މީހުން އެރަށުގައި އަރާ ފައިބާ ނިސްބަތާއި، މިކަންކަމަށް ބަލާފައި، އެރަށަކަށް ބޭނުންވާ ފެންވަރުގައި ވޭސްޓް މެނޭޖްމަންޓް ރާއްޖޭގެ ހުރިހާ ރަށެއްގައި މި އަހަރު ޤާއިމްކޮށް ނިންމާނަން." ރައީސް ވިދާޅުވިއެވެ.
ފިޔޯރީ ރައްޔިތުންނާ ބައްދަލުކުރައްވާ ރައީސް ދެއްކެވި ވާހަކަފުޅުގައި ވަނީ އެރަށުގެ ތަރައްޤީއަށްޓަކައި ވައުދުވެވަޑައިގެންފައިވާ ވައުދުތައް އަދި ރަށުގެ ރައްޔިތުން ބޭނުންވާ ކަންތައްތައް ޙައްލުކޮށްދެއްވާނެ ކަމުގެ ޔަޤީންކަންވެސް ދެއްވާފައެވެ.
ރައީސް ހުވަދޫ އަތޮޅަށް ކުރައްވާ ތިން ދުވަހުގެ މި ދަތުރުފުޅުގައި މިއަދު ވަނީ ހޯނޑެއްދޭ، ނަޑެއްލާ، އަދި ވާދޫއަށް ވަޑައިގެން އެރަށްރަށުގެ ރައްޔިތުންނާ ބައްދަލުކުރައްވާ، މި ސަރުކާރުގެ ތަރައްޤީގެ ތަޞައްވުރު ޙިއްސާކުރައްވާފައެވެ.
