ކުޅުދުއްފުށީ ކުޅީގައި އުޅޭ ގުޑުގުޑާ ދޫނިތަކަށް އުނދަގޫކުރާ ފަރާތްތަކާމެދު ފިޔަވަޅު އަޅާނެކަމަށް ކުޅުދުއްފުށީ ސިޓީ ކައުންސިލުން ބުނެފިއެވެ. މިހެން ބުނެފައިވަނީ ކުޅުދުއްފުށީ ސިޓީ ކައުންސިލުން އިއްޔެ ނެރުނު ޕޯސްޓެއްގައެވެ. މި ޕޯސްޓުގައި ބުނެފައިވާ ގޮތުގައި، އިރުވައި މޫސުމުގައި ކުޅުދުއްފުށީ ކުޅިއަށް ޒިޔާރަތްކުރާ ގުޑުގުޑާ ދޫނިތަކަށް ބައެއް ފަރާތްތަކުން އުނދަގޫކުރާ ކަމުގެ ޝަކުވާ ގިނަ ރައްޔިތުން ވަނީ ކައުންސިލަށް ހުށަހަޅާފައެވެ.
ކައުންސިލުން ފާހަގަކޮށްފައިވާ ގޮތުގައި، ބައެއް މީހުން ކުޅީގައި ކެނޯ ދުއްވައި، ދޫނިތަކަށް ގޯނާކުރާ ކަމަށް ޝަކުވާ ލިބިފައާ ލިބިފައިވެއެވެ. މީގެ އިތުރުން، ބައެއް ފަރާތްތަކުން ޑްރޯން ބޭނުންކޮށްގެން ދޫނިތަކަށް އުނދަގޫކުރާ ކަމަށްވެސް ވަނީ ފާހަގަކޮށްފައެވެ.
މި ކަންކަމާއި ގުޅިގެން، ކުޅުދުއްފުށީ ސިޓީ ކައުންސިލުން ވަނީ ގުޑުގުޑާ ދޫނިތައް ކުޅީގައި ތިބޭއިރު ކުޅީގައި ކެނޯ ދުއްވުމަކީ މަނާކަމެއް ކަމުގައި އިޢުލާނުކޮށްފައެވެ. އަދި ޑްރޯން ދުއްވާ ފަރާތްތަކުންވެސް ދޫނިތަކަށް އުނދަގޫވާފަދަ އެއްވެސް ޢަމަލެއް ނުހިންގުމަށް އިލްތިމާސްކޮށްފައިވެއެވެ.
ކައުންސިލުން އަންގާފައިވާ ގޮތުގައި، ކުޅީގައި ކެނޯ ދުއްވާ މީހުން ނުވަތަ ދޫނިތަކަށް އުނދަގޫވާ ފަދަ ޢަމަލުތައް ހިންގާ ފަރާތްތައް ފެނިއްޖެނަމަ 7328831 ނަންބަރަށް ގުޅައި ރިޕޯޓުކުރުމަށް ވަނީ އެދިފައެވެ.
