ނުޙައްޤުން ގޯއްޗާއި ފުލެޓް ދިން މައްސަލައިގައި ތުހުމަތު ކުރެވުމާއި ގުޅިގެން އަމިއްލައަށް އިސްތިއުފާދިން އެޗްޑީސީގެ ކުރީގެ އެމްޑީ ފަޒުލް ރަޝީދުގެ ގެއިން ފުލުހުން ގިނަ ޢަދަދަކަށް ފައިސާ ހޯދާފައިވާއިރު، އޭނާގެ އަތަށް 1.4 މިލިއަން ރުފިޔާގެ ނަގުދު ފައިސާ ދިން ކަމަށް ރިލެކްސް ފެރީ ސާވިސް އިން ބުނެފިއެވެ،
ރިލެކްސް ފެރީ ސާރވިސްގެ ފޭސްބުކް ޕޭޖުގައި ކުރި ޕޯސްޓެއްގައި ބުނެފައިވާ ގޮތުގައި، 2022 ވަނަ އަހަރު ފަޒުލްގެ ކުންފުންޏާއެކު މުޢާމަލާތްކޮށް ލޯންޗެއް ބަނދެފައިވާނެ އެވެ. އަދި އެ ލޯންޗުގެ ފެންވަރު ރަނގަޅުކަމުން ދެވަނަ ފަހަރަށް އިތުރު ލޯންޗެއް ބަނުމަށްޓަކައި 2024 ވަނަ އަހަރުގެ ކުރީކޮޅު މަޝްވަރާކޮށް، މިދިޔަ ޑިސެމްބަރު މަހުގެ ކުރީކޮޅު 1.4 މިލިއަން ރުފިޔާގެ ނަގުދު ފައިސާ ދީފައިވާނެ ކަމަށް ރިލެކްސް ފެރީގެ ޕޯސްޓްގައި ބުނެފައިވެ އެވެ.
ފަޒުލްގެ މައްސަލަ ފުލުހުން ދަނީ ތަޙްޤީޤް ކުރަމުންނެވެ.
ފަޒުލް ބުނެފައިވަނީ ކޮރަޕްޝަނުގެ ޢަމަލެއް އޭނާ ހިންގާފައި ނުވާ ކަމަށެވެ.
ބިންވެރިޔާ" ސްކީމާ ގުޅިގެން އެޗްޑީސީއަށް އަމާޒުވެފައިވާ ތުހުމަތުތަކަކީ އެ ކުންފުންޏާއި އެއްވެސް ގުޅުމެއް ހުރި ކަންތައްތަކެއް ނޫން ކަމަށް ފަޒުލް ވިދާޅުވެފައި ވެއެވެ. އަދި އެ ތުހުމަތުތަކުގެ ޙަޤީޤަތް ވީ އެންމެ އަވަސް ފުރުޞަތެއްގައި ރައްޔިތުންނަށް ހާމަވުމަށް އެދޭކަމަށާއި، މިކަމުގެ ސަބަބުން އެޗްޑީސީއާއި ސަރުކާރުގެ ސިޔާސަތުތައް ހުއްޓިފައި އޮތުމަށް ނޭދޭ ކަމަށް ވެސް ފަޒުލް ބުނެފައި ވެއެވެ..
ފަޒުލް އިސްތިއުފާ ދިން ސަބަބުގެ ގޮތުގައި، "ބިންވެރިޔާ" ސްކީމާއި ގުޅިގެން މިހާރު ކުރިއަށްދާ ތަޙުޤީޤަށް ފުރުޞަތު ދިނުމަށާއި، އެޗްޑީސީއާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުޞަތު ދިނުމުގެ ގޮތުން ކަމަށް އިސްތިއުފާގެ ސިޓީގައި ވެއެވެ.
