ޕްރިމިއަރ ލީގުގެ ޗެމްޕިއަންކަމަށް ވާދަކުރާ ޓީމުތަކުގެ ތެރޭގައި ޗެލްސީ ނުހިމެނޭ ކަމަށް އެ ޓީމުގެ ކޯޗް އެންޒޯ މަރެސްކާ ބުނެފިއެވެ. މަރެސްކާ މިހެން ބުނީ މާދަމާ ފުލަމްއާއި ދެކޮޅަށް ކުޅޭ މެޗުގެ ކުރިން އިނގިރޭސި މީޑިއާއަށް ދިން ބަސްދީގަތުމެއްގައެވެ.
ޗެލްސީ އެންމެ ފަހުން ކުޅުނު މެޗުގައި އެވަރޓަންއާ ދެކޮޅަށް ގޯލެއް ނުޖެހި އެއްވަރުވިއިރު ލީގު ތާވަލުގައި އެޓީމު އޮތީ އެއްވަނައިގައި އޮތް ލިވަޕޫލްއާ ހަތަރު ޕޮއިންޓުގެ ފަރަގެއްގައެވެ.
ލިވަޕޫލްއަށް ވުރެ އެއް މެޗު އިތުރަށް ކުޅެފައިވާއިރު، ފާއިތުވި ނުވަ މެޗުގައި ވެސް ޗެލްސީ ބަލިވެފައެއް ނުވެއެވެ. އެ ޓީމު މިހާރު ވަނީ އާސެނަލްއާއި މެންޗެސްޓަރ ސިޓީ ފަހަތަށް ޖައްސަލައި ތާވަލުގައި ދެވަނައަށް ޖެހިލާފައެވެ.
މަރެސްކާ ބުނީ ލިވަޕޫލް ވަރަށް ރަނގަޅު ކުޅުމެއް ދައްކަމުންދާ ކަމަށާއި، މެންޗެސްޓަރ ސިޓީވެސް ފަހުން ޓައިޓަލަށް ވާދަކުރާނެ ކަމަށް ލަފާކުރެވޭ ކަމަށެވެ.
"އަޅުގަނޑުގެ އަމާޒަކީ ޓީމުގެ ރަނގަޅުކުރަންޖެހޭ ކަންތައްތައް ރަނގަޅުކޮށް ނަތީޖާ ނެރުން. ޗެލްސީއަކީ މި ޓައިޓަލްއށް މިފަހަރު ވާދަކުރާނެ ޓީމެއް ކަމަކަށް އަޅުގަނޑު ނުދެކެން. އެހެނެއް ނޫން، ސިޓީ އަދިވެސް ވާދަކޮށްފާނެ" މަރެސްކާ ބުންޏެވެ.
ޗެލްސީއާ ދެކޮޅަށް ކުޅޭ މެޗަކީ ބޮޑު ގޮންޖެހުމެއް ކަމަށް ފުލަމްގެ ކޯޗް މާކޯ ސިލްވާ ބުންޏެވެ. "ޗެލްސީއަކީ ވަރަށް ރަނގަޅު ޓީމެއް. އެއީ ވަރަށް ސާފު ކަމެއް،"
ޗެލްސީގެ ފޯވަޑް ނިކޮލަސް ޖެކްސަން ވަނީ ސްޓޭމްފޯޑް ބްރިޖުގައި އެންމެ ފަހުން ކުޅުނު 19 މެޗުގައި 11 ގޯލާއި ހަތަރު އެސިސްޓް ދީފައެވެ. އަނެއްކޮޅުން، ފުލަމްގެ އެމައިލް ސްމިތް ރޯވް ވަނީ ޗެލްސީއާ ދެކޮޅަށް ކުޅުނު ހަތަރު މެޗުގެ ތެރެއިން ތިން މެޗުގައި ގޯލު ޖަހާ އެސިސްޓް ދީފައެވެ.
ޗެލްސީ ވަނީ ފުލަމްއާއި ދެކޮޅަށް އެންމެ ފަހުން ހޯމްގައި ކުޅުނު 19 މެޗުގައި ބަލިނުވެ ހިފަހައްޓާފައެވެ. ޗެލްސީއާ ދެކޮޅަށް ކުޅުނު 34 މެޗުގެ ތެރެއިން ފުލަމް މޮޅުވީ އެންމެ ދެ މެޗުންނެވެ. މިއީ ޕްރިމިއަރ ލީގުގައި އެއް ޓީމަކުން އަނެއް ޓީމަކާ ދެކޮޅަށް ކުޅެ އެންމެ މަދުން މޮޅުވެފައިވާ ރޭޓެވެ.
ނަމަވެސް ފުލަމް ވަނީ ފާއިތުވި ނުވަ ލަންޑަން ޑާބީ މެޗުގައި ބަލިނުވެ ހިފަހައްޓާފައެވެ. މީގެ ކުރިން މިފަދަ ދިގު ރެކޯޑެއް އެމީހުން ހޯދާފައިވަނީ 1936 އާއި 1938 އާ ދެމެދުގައެވެ.
ޗެލްސީގެ ފަހުގެ ރަނގަޅު ކުޅުމަށް ބަލާއިރު، މި މެޗުގައި ޗެލްސީ މޮޅުވުމުގެ ފުރުސަތު ބޮޑެވެ. ކުރިން ވެސް ބުނިހެން ޗެލްސީ ވަނީ ފާއިތުވި ނުވަ މެޗުގައި ބަލިނުވެ ހިފަހައްޓާފައެވެ. މި ސީޒަންގައި ޗެލްސީ ބަލިވެފައިވަނީ އެންމެ ދެ މެޗުގައެވެ. އެއީ މެންޗެސްޓަރ ސިޓީއާއި ލިވަޕޫލް އަތުންނެވެ.
ޕޯލްތަކަށް ބަލާއިރު، މާދަމާގެ މެޗުން ޗެލްސީ މޮޅުވުމުގެ ފުރުސަތު 61.1 އިންސައްތަ އެބައޮތެވެ. ފުލްހަމް މޮޅުވާނެ ކަމަށް ބުނަނީ 19.2 އިންސައްތަ މީހުންނެވެ.
