ހައި އެޗީވާސް ސްކޮލަރޝިޕް ލިބޭ ދަރިވަރުން ކިޔަވަން ފަށާ ކޯސް ބަދަލު ކުރެވޭ ގޮތަށް އުޞޫލު ބަދަލުކޮށްފިއެވެ.
ހަޔަރ އެޑިއުކޭޝަން މިނިސްޓްރީން ބުނީ ސްކޮލަރޝިޕްގައި ކިޔަވަން ފަށާ ޕްރޮގްރާމް ވަކި ހިސާބަކުން ބަދަލު ކުރެވޭނެ ގޮތަށް، ދިވެހިރާއްޖޭގެ ސްކޫލްތަކާއި މަދަރުސާތަކުގެ ދަރިވަރުން ބައިވެރިވާ މަތީސާނަވީ އިމްތިޙާނުތަކުން އެއްވަނަ ދަރަޖައިގައި ފާސްވެފައިވާ ދަރިވަރުންނަށް ދިވެހި ސަރުކާރުން ދޭ ހައި އެޗީވާސް ސްކޮލަރޝިޕް ދިނުމާބެހޭ ސްކީމާ ގުޅޭ ކަންކަން ބަޔާން ކުރާ އުޞޫލަށް މިހާރުވަނީ ބަދަލު ގެނެސް ގެޒެޓް ކުރެވިފައި ކަމަށެވެ.
މީގެ ކުރިން 2019 ވަނަ އަހަރު ގެޒެޓް ކޮށްފައިވާ އުޞޫލުގައި ސްކޮލަރޝިޕަށް ހޮވޭ ދަރިވަރުން، އެދަރިވަރުން ކިޔަވާ ޕްރޮގްރާމް ބަދަލުކުރެވޭނެ ގޮތެއް ކަމަށް ކަނޑައަޅާފައި އޮންނަނީ ޕޭމަންޓް ދެއްކުމުގެ ކުރިންނެވެ. ޕްރޮގްރާމަށް ޕޭމަންޓް ދެއްކުމަށްފަހު ބަދަލުކުރެވޭނެ އުޞޫލެއް ނުވެއެވެ. އެހެން ނަމަވެސް ވޭތުވެދިޔަ ދުވަސްތަކުގައި މަތީ ތަޢުލީމު ޙާސިލްކުރަމުން ދިޔަ ދަރިވަރުންގެ ތެރެއިން ގިނަ ދަރިވަރުންތަކެއް ވަނީ އެ ދަރިވަރުންނަށް ދިމާވާ އެކި އެކި ޙާލަތުގައި ކިޔަވަމުން އަންނަ ޕްރޮގްރާމް ބަދަލު ކުރުމަށް އެދިފައި ކަމަށް ހަޔަރ އެޑިއުކޭޝަން މިނިސްޓްރީން ބުންޏެވެ.
މިނިސްޓްރީން ބުނީ އިއްޔެ ގެޒެޓް ކުރެވުނު އުސޫލުގެ 7 ވަނަ މާއްދާގައި ވަނީ ސްކޮލަރޝިޕަށް ކިޔަވަމުންދާ ދަރިވަރުން ޕްރޮގްރާމް ބަދަލުކުރުމަށް 3 ޙާލަތެއް ކަނޑައަޅާފައި ކަމަށެވެ. އެ 3 ޙާލަތަކީ:
(ހ.) ޕްރޮގްރާމް ބަދަކުރެވޭ ޙާލަތްތަކުގެ ތެރޭގައި، ޕްރޮގްރާމް ބަދަލުކުރަން ހުށަހަޅާއިރު، ކުރިން ހުށަހެޅި ޕްލޭސްމަންޓް ލިބުނުކަމުގެ ލިސްޓުގައި ބަޔާންކޮށްފައިވާ، މަތީ ތަޢުލީމުދޭ މުއައްސަސާއަށް އެއްވެސް ޕޭމަންޓެއް ހަދާފައިނެތުން.
(ށ.) ޕްރޮގްރާމް ބަދަލުކުރަން އެދޭއިރު، ކުރިން ހުށަހެޅި ޕްލޭސްމަންޓް ލިބުނުކަމުގެ ލިޔުމުގައި ބަޔާންކޮށްފައިވާ، މަތީ ތަޢުލީމު ދޭ މުއައްސަސާއަށް ޕޭމަންޓެއް ހަދާފައިވަނިކޮށް ޕްރޮގްރާމް ބަދަލުކުރަން އެދޭ ނަމަ، ތިރީގައި ބަޔާންކޮށްފައިވާ ކަންކަން ފުރިހަމަވުން ނުވަތަ މި މާއްދާގެ (ނ.) ގައި ބަޔާންކޮށްފައިވާ ޙާލަތު ކަމުގައިވުން.
- ބަދަލުކުރަން ހުށަހެޅީ، ކިޔަވަންފެށި ޕްރޮގްރާމްގެ ފުރުތަމަ ސެމިސްޓަރ ނިމުމުގެ ކުރިން ކަމުގައިވުން.
- ދޫކޮށްލާ ޕްރޮގްރާމް ފުރިހަމަކުރުމަށް ދަރިވަރުގެ ޚަރަދުގައި ފުރިހަމަކޮށްފައިވާ ޕްރޮގްރާމްތަކަކީ، ބަދަލުވާ ޕްރޮގްރާމްގެ ޖުމްލަ ޚަރަދުން އުނިކުރެވޭނެ އެއްޗެއްކަމުގައި އެއްބަސްވުން.
- ޕްރޮގްރާމް ބަދަލުކުރަންޖެހޭ ސަބަބު، އެކަންކުރުން މުޙިންމުކަމަށް ބާރުދޭ، ކަމާއި ބެހޭ ރަސްމީ ފަރާތްތަކާއިއެކު ހުށަހަޅާފައި އޮތުން.
- ޕްރޮގްރާމް ބަދަލުވީ ނަމަވެސް، އެ ސްކޮލަރޝިޕްގެ އުޞޫލުގެ އެއްވެސް މާއްދާއަކާއި ތަޢާރުޒުވުމެއް ނެތުން.
- ޕްރޮގްރާމް ބަދަލުކުރާ ފުރުތަމަ ފަހަރު ކަމުގައިވުން. (އެއް ފަހަރަށްވުރެ ގިނަފަހަރު ބަދަލު ނުކުރެވޭނެ)
- ދޫކޮށްލާ ޕްރޮގްރާމް ފުރިހަމަކުރުމަށް ހިނގާ ޚަރަދަށްވުރެ، ޖުމްލަ ޚަރަދު ބޮޑު ނުވާ ޚަރަދަކަށް ބަދަލުވާން އެދުން.
މީގެ ކުރިން އާންމުކޮން މާސްޓަރސް އަށް ދެވެނީ ބެޗްލަރސް ސެޓިފިކެޓްއެއް އޮވެގެނެވެ. އެހެންނަމަވެސް މި އުޞޫލުގެ 7 ވަނަ މާއްދާގެ (ނ) ގައި ބަޔާންކޮށްފައިވާ ގޮތުން ބެޗްލަރސް ޑިގްރީއެއް ނެތިވެސް މާސްޓަރސްއަށް ދިއުމުގެ ފުރުޞަތު ފަހިވެގެން ދެއެވެ.
(ނ.) ބަދަލުވާން އެދޭ ޕްރޮގްރާމަކީ، ފުރަތަމަ ޑިގްރީއަކާއި ނުލައި، ސީދާ އެންޓްރީ ލިބޭ 4 އަހަރަށް ވުރެ ދިގު ނޫން މާސްޓަރސް ޑިގްރީ ޕްރޮގްރާމެއް ކަމުގައިވުން. މި ޙާލަތުގައި ތިރީގައިވާ ކަންކަން ފުރިހަމަވާން ޖެހޭނެ:
- ސްކޮލަރޝިޕްގެ ޖުމްލަ މުއްދަތުކަމުގައި ބަލަނީ 4 އަހަރު ދުވަސްކަމަށާއި، ބަދަލުވުމުން ސްކޮލަރޝިޕުން ދެން ޚަރަދުކުރާނީ ބަދަލުވި އިރު އެ މުއްދަތުން ބާކީ އޮންނަ ދުވަސްތަށް ކަމަށް އެއްބަސްވުން.
- ބަދަލުކުރަން އެދެނީ މި އުޞޫލަށް ޢަމަލުކުރަން ފެށިއިރު، ކިޔަވަމުންދާ ދަރިވަރެއްކަމުގައިވުން.
- ޕްރޮގްރާމް ބަދަލުކުރާ ފުރުތަމަ ފަހަރުކަމުގައިވުން.
- ޕްރޮގްރާމް ބަދަލުވީ ނަމަވެސް، އެ ސްކޮލަރޝިޕްގެ އުޞޫލުގެ އެހެން އެއްވެސް މާއްދާއަކާއި ތަޢާރުޒުވުމެއްނެތުން.
ދިވެހިރާއްޖޭގެ ސްކޫލްތަކާއި މަދަރުސާތަކުގެ ދަރިވަރުން ބައިވެރިވާ މަތީސާނަވީ އިމްތިޙާނުތަކުން އެއްވަނަ ދަރަޖައިގައި ފާސްވެފައިވާ ދަރިވަރުންނަށް ދިވެހި ސަރުކާރުން ދޭ ހައި އެޗީވާސް ސްކޮލަރޝިޕް ދިނުމާބެހޭ ސްކީމާ ގުޅޭ ކަންކަން ބަޔާން ކުރާ އުޞޫލަށް ގެނައި ބަދަލުގައި އިތުރަށް ގެނެސްފައިވަނީ ކުރިން ހުރި މާއްދާތަކުން ރައްޔިތުންނަށް އޮޅުން އަރާފަދަ ގޮތަކަށް ހުރި ތަންތަން އިތުރަށް ސާފުކޮށް ފަހުމުވާނެހެން އިބާރާތްތަކަށް ގެނެވިފައިވާ ބަދަލުތަކާއި ތަފްސީލުތަކެއް ކަމަށް މިނިސްޓްރީން ބުންޏެވެ.
