ޕެންޝަނާއި ގުޅޭ ޢިލްމީ ދިރާސާތައް ކުރުމާއި ހޭލުންތެރިކުރުމުގެ ޕްރޮގްރާމުތައް ހިންގުމަށް ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އާއި މޯލްޑިވްސް ޕެންޝަން އެޑްމިނިސްޓްރޭޝަން އޮފީހާއި ދެމެދު އެއްބަސްވުމެއްގައި ސޮއިކޮށްފިއެވެ.
އެމްއެންޔޫގައި ބޭއްވުނު ރަސްމިއްޔާތެއްގައި މި އެއްބަސްވުމުގައި އެފަރާތުން ސޮއިކުރެއްވީ ވައިސް ޗާންސެލަރ ޑރ. އައިޝަތު ޝެހެނާޒް އާދަމެވެ. ޕެންޝަން އޮފީހުގެ ފަރާތުން ސޮއިކުރެއްވީ އެ އޮފީހުގެ ޗީފް އެގްޒެކެޓެގްޒެކެޓިވް އޮފިސަރ ޝުޖާޢަތު ހަލީމެވެ.
މި އެއްބަސްވުމުގެ ދަށުން ކުރަން ނިންމާފައިވާ މުހިންމު ކަންތައްތަކުގެ ތެރޭގައި ޖޮއިންޓް ރިސާރޗް ޕްރޮޖެކްޓްތައް އެކުލަވާލައި ހިންގުމާއި، މަޢުލޫމާތާއި ޑޭޓާ ބަދަލުކުރުމާއި، ހޯދުމުގައި އެއްބާރުލުން ދިނުން ހިމެނެއެވެ. މީގެ އިތުރުން، ޕެންޝަނާއި ގުޅޭގޮތުން އާންމުން ހޭލުންތެރިކުރުމާއި، ޕެންޝަނަށް އާންމުން އަހުލުވެރިކުރުމަށް ޕްރޮގްރާމުތައް ހިންގުންވެސް ހިމެނޭ ކަމަށް އެމްއެންޔޫއިން ބުންޏެވެ.
ދިވެހިރާއްޖޭގެ ޤައުމީ ޔުނިވަރސިޓީއިން ބުނީ މި އެއްބަސްވުމާއެކު ދެފަރާތުގެ ކުރިއެރުމާއި، މުޖުތަމަޢަށް ފައިދާހުރި އައު ފުރުޞަތުތައް ހޯދުމަށް މަގުފަހިވެގެންދާނެ ކަމަށެވެ.
ޕެންޝަނަކީ މީހަކު އުމުރުން ދުވަސްވުމުން ނުވަތަ ރިޓަޔަރވުމަށްފަހު ބޭނުންކުރުމަށް އެއްކުރާ ފައިސާއެވެ. އަދި އާމްދަނީއެއް ނުލިބޭ އުމުރުން ދުވަސްވީ މީހުންނަށް ދައުލަތުން ދޭ ފައިސާވެސް މީގެ ތެރޭގައި ހިމެނެއެވެ.
