މާލެ ވޯޓަރ އެންޑް ސުވަރެޖް ކޮމްޕެނީ (އެމްޑަބްލިއުއެސްސީ)ގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު މިއަދު ސަސްޕެންޑްކޮށްފިއެވެ.
އެމްޑަބްލިއުއެސްސީން މިއަދު ނެރުނު ބަޔާނެއްގައި ބުނެފައިވަނީ ފަޒީލް ސަސްޕެންޑްކޮށްފައިވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ގުޅޭގޮތުން ދިވެހި ފުލުހުންގެ ޚިދުމަތުން ކުރިއަށްގެންދާ ތަހުގީގަކަށް އެއްބާރުލުން ދިނުމުގެ ގޮތުން ކަމަށެވެ. މި ސަސްޕެންޝަން މިއަދުން ފެށިގެން އަމަލުކުރަން ފަށާފައިވާ ކަމަށާއި، ފަޒީލް ވަނީ އޭނާގެ ހުރިހާ މަސްއޫލިއްޔަތުތަކުން ވަގުތީގޮތުން ދުރުކޮށްފައި ކަމަށްވެސް އެ ބަޔާނުގައި ބުނެފައިވެއެވެ.
މި ނިންމުން ނިންމާފައިވަނީ އެމްޑަބްލިއުއެސްސީގެ ބޯޑުން ކަމަށް އެ ކުންފުނިން ހާމަކޮށްފައިވެއެވެ.
ޑީއެމްޑީ ސަސްޕެންޑް ކޮށްފައި މިވަނީ ބިންވެރިޔާ ސްކީމާއި ގުޅިގެން ތުހުމަތުކުރެވޭ މައްސަލައެއް ފުލުހުން ތަހުގީގުކުރަމުންދާ ދަނޑިވަޅެއްގައެވެ. މި މައްސަލައާ ގުޅިގެން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ވަނީ އެޗްޑީސީގެ ބޯޑު މެންބަރުންގެ ތެރެއިން ޗެއަރމަން ފިޔަވައި އެހެން ހުރިހާ މެންބަރުން ސަސްޕެންޑްކޮށްފައެވެ.
