މުމްބާއީގައި އިންޑިއާގެ ކަނޑުގެ ސިފައިންގެ އުޅަނދެއް ފަސިންޖަރުން އުފުލާ ފެރީއެއްގައި ޖެހި 13 މީހަކު މަރުވެއްޖެ އެވެ.
އިންޑިއާގެ ކަނޑުގެ ސިފައިން ނެރުނު ބަޔާނެއްގައި ބުނެފައިވާ ގޮތުގައި ނޭވީގެ ސްޕީޑްބޯޓު އިންޖީނު ޗެކް ކުރުމަށް ދަތުރުކުރަމުން ދަނިކޮށް ކޮންޓްރޯލުން ނެއްޓުނީއެވެ.
އެ ބަޔާނުގައިވާ ގޮތުން މިހާދިސާގައި އިންޑިއާގެ ކަނޑުގެ ސިފައިންގެ އޮފިސަރަކާއި ޓެކްނިކަލް ސްޓާފުންގެ ދެ މީހަކު ހިމެނޭ ގޮތަށް ޖުމްލަ 13 މީހުން މަރުވެފައިވެ އެވެ.
ފެރީގައި 110 އެއްހާ މީހުން ތިބިއިރު އެކްސިޑެންޓުގެ ދެތިން ސިކުންތު ކުރިން ނަގާފައިވާ ވީޑިއޯއެއް ވެސް ވަނީ ފެންމަތިވެފަ އެވެ.
ޚަބަރުތައް ބުނާ ގޮތުގައި އިތުރު ތިން މީހެއްގެ ހާލު ސީރިއަސް ކަމަށާއި 94 މީހަކު ވަނީ ސަލާމަތްކޮށްފަ އެވެ.
ސަލާމަތީ އޮޕަރޭޝަންގައި އިންޑިއާގެ ކަނޑުގެ ސިފައިންނާއި ކޯސްޓްގާޑުގެ 11 އުޅަނދެއް ބައިވެރިވެފައިވާއިރު، ސަލާމަތީ މިޝަންގައި މެރިން ޕޮލިސްގެ ތިން އުޅަނދާއި ކޯސްޓްގާޑް އާއި، ސާޗް އޮޕަރޭޝަންގައި ހަތަރު ހެލިކޮޕްޓަރުން ވެސް ބައިވެރިވެފައިވާއިރު، ސަލާމަތީ މިޝަންގައި މަސްވެރިންނާއި ޢާންމުން ވެސް ދަނީ ޙަރަކާތްތެރިވަމުންނެވެ.
