މިދިޔަ މަހު ޕްރިމިއާކުރި ހޮލީވުޑްގެ މަޝްހޫރު ފެންޓަސީ ފިލްމު "ވިކެޑް" ގެ ދެވަނަ ބައެއް އަންނަނީއެވެ. މި ފިލްމު އުފެއްދި ޔުނިވާސަލް ޕިކްޗާސް އިން ވަނީ ދެވަނަ ބައިގެ ޓައިޓަލް އާއި ނެރޭނެ ތާރީޚު ވެސް އިއުލާންކޮށްފައެވެ.
"ވިކެޑް: ފޯ ގުޑް" ގެ ނަމުގައި ނެރޭ މި ފިލްމުގެ ދެވަނަ ބައި ޕްރިމިއާކުރާނީ އަންނަ އަހަރުގެ ނޮވެމްބަރު 21 ވަނަ ދުވަހުއެވެ. މި ޚަބަރު އިއުލާންކުރުމާއެކު ގިނަ ބެލުންތެރިން ވަނީ އުފާ ފާޅުކޮށްފައެވެ.
"ވިކެޑް" އަކީ އެމެރިކާގެ ވާހަކަ ލިޔުންތެރިޔާ ގްރެގޯރީ މެގުއާޔާ 1995 ވަނަ އަހަރު ބްރޯޑްވޭއަށް ލިޔުނު "ވިކެޑް: ދަ ލައިފް އެންޑް ޓައިމްސް އޮފް ދަ ވިކެޑް ވިޗް އޮފް ވެސްޓް" ކިޔާ ޑްރާމާ ސްކްރިޕްޓަކަށް ބިނާކޮށް ގެނެސްދީފައިވާ ފިލްމެކެވެ. މި ފިލްމުގެ ފުރަތަމަ ބައި ޕްރިމިއާކުރީ މިދިޔަ މަހުގެ 22 ވަނަ ދުވަހުއެވެ.
150 މިލިއަން ޑޮލަރުގެ ބަޖެޓަކުން ހެދި މި ފިލްމަށް ވަނީ ބޮކްސް އޮފީހުގައި 525 މިލިއަން ޑޮލަރު ލިބިފައެވެ. މީގެ އިތުރުން ފިލްމު ފާޑުކިޔާ ފަރާތްތަކުން ވެސް ވަނީ މި ފިލްމަށް ތައުރީފުކޮށްފައެވެ.
މި ފިލްމުގައި އަރިއާނާ ގްރާންޑޭ، ސިންތީއާ އެރިވޯ، ޖޮނަތަން ބެއިލީ، އީތަން ސްލޭޓާ، މިޝޭލް ޔޯން، ޖެފް ގޯލްޑްބްލަމް އަދި ޕީޓާ ޑިންކްލޭޖު ފަދަ މަޝްހޫރު ތަރިން މުހިންމު ރޯލުތައް އަދާކޮށްފައިވެއެވެ.
