ހޮލީވުޑްގެ މަޝްހޫރު ސުޕަހީރޯ ފިލްމެއް ކަމަށްވާ ސުޕަމޭންގެ އާ ބައިގެ ޕޯސްޓަރު ޑީސީ ޔުނިވާސްއިން ދައްކާލައިފިއެވެ.
މި ފިލްމަކީ ޑީސީ ސްޓޫޑިއޯއިން ތައްޔާރުކުރާ އެންމެ ފަހުގެ ސުޕަހީރޯ ފިލްމެވެ.
ޕޯސްޓަރުގައި ފެންނަނީ މި ފިލްމުގައި ސުޕަމޭންގެ ރޯލު ކުޅޭ ޑޭވިޑް ކޮރެންސްވެޓްއެވެ. އޭނާ ހުރީ ސުޕަމޭންގެ މަޝްހޫރު ކޮސްޓިއުމްގައެވެ. މީގެ އިތުރުން، ޑީސީއިން ވަނީ މޯޝަން ޕޯސްޓަރެއް ވެސް އާންމުކޮށްފައެވެ. އަދި މި ފިލްމުގެ ފުރަތަމަ ޓްރެއިލާ މާދަމާ ނެރުމަށް ހަމަޖެހިފައިވާ ކަމަށް އެ ކުންފުނިން ބުންޏެވެ.
މި ފިލްމު ޑައިރެކްޓުކުރަނީ ޑީސީ ސްޓޫޑިއޯ ހިންގުމާ މިހާރު ހަވާލުވެ ހުރި ޖޭމްސް ގަންއެވެ. ޖޭމްސްއަކީ މާވެލްގެ "ގާޑިއަންސް އޮފް ދަ ގެލެކްސީ" އާއި ޑީސީގެ "ސުއިސައިޑް ސްކޮޑް" ފަދަ މަޝްޙޫރު ފިލްމުތައް ޑައިރެކްޓުކޮށްފައިވާ ފަންނާނެކެވެ. މި ފިލްމުގެ ސްކްރީންޕްލޭ ލިޔެފައިވަނީ ވެސް ޖޭމްސްއެވެ.
ފިލްމުގެ ވާހަކަ ބިނާވެފައިވަނީ ދުނިޔޭގައި އުޅެ ބޮޑުވި ސުޕަމޭންގެ އުފަން ޕްލެނެޓް، ކްރިޕްޓޯންގެ ސަޤާފަތާއި ތަރިކަ އަލުން ހޯދުމަށް ކުރާ ދަތުރުގެ މައްޗަށެވެ. މި ފިލްމު ޕްރިމިއާކުރުމަށް ހަމަޖެހިފައިވަނީ އަންނަ އަހަރުގެ ޖުލައި 11 ވަނަ ދުވަހުއެވެ.
