ޓޫރިޒަމް ދާއިރާގެ ޖީއެސްޓީ ރޭޓަށް އަންނަ ބަދަލަށް ތައްޔާރުވުމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން އިލްތިމާސްކޮށްފިއެވެ.
މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ގެނެވުނު 7 ވަނަ އިޞްލާޙުގެ ދަށުން، 2025 ޖުލައި 1 އިން ފެށިގެން ޓޫރިޒަމް ދާއިރާގެ ޖީއެސްޓީ ރޭޓް 16 އިންސައްތައިން 17 އިންސައްތައަށް އިތުރުވާނެއެވެ.
މީރާއިން ބުނެފައިވާ ގޮތުގައި، މި ބަދަލާއި ގުޅިގެން ވިޔަފާރިތަކުން އެތަނެއްގެ ސިސްޓަމްތަކަށް ގެންނަންޖެހޭ ބަދަލުތައް ގެނައުމަށާއި، އަގުތައް ބަދަލުކުރުމަށް ދުރާލާ ތައްޔާރުވުން މުހިންމެވެ. އަދި މި ތާރީޚުގެ ފަހުން ޖީއެސްޓީ ލާޒިމުވާ ވަގުތު އަންނަ ޓޫރިޒަމް ދާއިރާގެ މުދަލާއި ޚިދުމަތުގެ މުޢާމަލާތްތަކުން ޖީއެސްޓީ ނަގަންވާނީ އައު ރޭޓު ކަމުގައިވާ 17 އިންސައްތައިގެ ރޭޓުންނެވެ.
މީރާއިން އިތުރަށް ސާފުކޮށްދިން ގޮތުގައި، ޓޫރިޒަމް ދާއިރާގެ ޖީއެސްޓީއަށް ރަޖިސްޓަރީކޮށްފައިވާ ފަރާތަކީ 24 ގަޑިއިރުގެ އުސޫލުން ވިޔަފާރިކުރާ ފަރާތެއް ކަމުގައިވާނަމަ، 2025 ޖުލައި 1 ގެ 00:00 ގެ ކުރިން ފޯރުވައިދޭ ޓޫރިޒަމް ދާއިރާގެ މުދަލާއި ޚިދުމަތުގެ އަގުން ޖީއެސްޓީ ނަގަންވާނީ 16 އިންސައްތައިގެ ރޭޓުންނެވެ. އަދި 2025 ޖުލައި 1 ގެ 00:00 ގައި ނުވަތަ އޭގެ ފަހުން ފޯރުވައިދޭ ޓޫރިޒަމް ދާއިރާގެ މުދަލާއި ޚިދުމަތުން ޖީއެސްޓީ ނަގަންވާނީ 17 އިންސައްތައިގެ ރޭޓުންނެވެ.
މި ބަދަލަކީ ޓޫރިޒަމް ދާއިރާއަށް އަންނަ މުހިންމު ބަދަލެއް ކަމަށާއި، މި ބަދަލާ ގުޅިގެން ވިޔަފާރިތަކުން ކުރަންޖެހޭ ތައްޔާރީތައް ވަގުތުން ފެށުމަކީ މުހިންމު ކަމެއް ކަމަށް މީރާއިން ވަނީ އިލްތިމާސްކޮށްފައެވެ. އަދި މި ބަދަލާއި ގުޅޭ އިތުރު މަޢުލޫމާތު ބޭނުންވާ ފަރާތްތަކަށް މީރާގެ ވެބްސައިޓުން ނުވަތަ ސީދާ މީރާއަށް ގުޅައިގެން މަޢުލޫމާތު ސާފުކުރެވޭނެ ކަމަށްވެސް މީރާއިން ބުނެފައިވެއެވެ.
