އެންމެ އަވަހަށް ވެސް އިންތިޚާބެއް ބޭއްވޭނީ އަންނަ އަހަރު ނިމޭއިރު ނުވަތަ 2026 ވަނަ އަހަރުގެ ކުރީކޮޅު ކަމަށް ބަންގްލަދޭޝްގެ ކެއާޓޭކަރ ސަރުކާރުގެ ވެރިޔާ މުހައްމަދު ޔޫނުސް ވިދާޅުވެއްޖެއެވެ.
އިންތިޚާބު ބޭއްވުމަށް ޕްރެޝަރުތައް އިތުރުވަމުންދާއިރު ނޮބެލް އިނާމު ހާސިލްކޮށްފައިވާ އިގްތިސާދީ މާހިރު މުހައްމަދު ޔޫނުސް ވަނީ އޭނާގެ ބާރު ހުރިހާ ދިމާލެއްގައި އޮންނަ ކަހަލަ އިންތިޤާލީ ސަރުކާރެއް އެކުލަވާލައި ކޮމިޝަންތައް ވެސް އެކުލަވާލާފައެވެ.
ބަންގްލަދޭޝްގެ ދަރިވަރުން އިސްވެ އޮވެ ސަރުކާރާއި ދެކޮޅަށް ވަރުގަދަ މުޒާހަރާތަކެއް ކޮށް، ސިފައިންނާއި ފުލުހުންގެ ތެރެއިން ވެސް ގިނަބަޔަކު ބޮޑުވަޒީރު ޝެއިޚް ހަސީނާ އާއި ދެކޮޅަށް ސިއްރިޔާތުގައި ތެދުވެ އެ ސަރުކާރު ވައްޓާލިއިރު، އޭގެ ފަހުން މުހައްމަދު ޔޫނުސް ވަނީ 'ޗީފް އެޑްވައިޒަރު' ކަމަށް އައްޔަން ކުރައްވާފަ އެވެ.
"އިންތިހާބުގެ ތާރީހުތައް ކަނޑައެޅޭނީ 2025 ވަނަ އަހަރު ނިމޭއިރު ނުވަތަ 2026 ވަނަ އަހަރުގެ ފުރަތަމަ ބައިގެ ނިޔަލަށް،" ދައުލަތުގެ ޓީވީން މުޙައްމަދު ޔޫނުސް މިއަދު ވިދާޅުވި އެވެ.
މުޙައްމަދު ޔޫނުސް ޤައުމު އިސްލާހުކުރުމަށް ކޮމިޝަންތައް އުފައްދަވާފައިވާއިރު، އިންތިޚާބު ބާއްވާ ތާރީހު ބިނާވެފައިވަނީ ސިޔާސީ ޕާޓީތަކުން އެއްބަސްވާ ތާރީޚެއްގެ މައްޗަށެވެ.
"މިދެމެދުގައި އަޅުގަނޑު ބާރުއަޅާފައި މިވަނީ އިންތިހާބުގެ އިންތިޒާމު ހަމަޖެއްސުމުގެ ކުރިން އިސްލާހުތައް ކުރަންޖެހޭ ކަމަށް،" އޭނާ ވިދާޅުވި އެވެ.
އުމުރުން 77 އަހަރުގެ ހަސީނާ އިންޑިއާއަށް ފިލައިގެން ދިޔައީ އޮގަސްޓް މަހުގެ ފަސް ވަނަ ދުވަހު އޭނާގެ ގެކޮޅަށް މުޒާހަރާގެ ބައިވެރިން ވަދެގަތުމުންނެވެ.
ހަސީނާގެ ސަރުކާރުގައި އިންސާނީ ހައްގުތަކާ ޚިލާފު ފުޅާދާއިރާއެއްގައި ތުހުމަތުތަކެއް ކުރެވިފައިވާއިރު، ޝަރީއަތުން ބޭރުން މީހުން މެރުމާއި، ރަހީނުކުރުމާއި، ސިޔާސީ އިދިކޮޅު އެތައް ސަތޭކަ ބަޔަކު ގެއްލުވާލުން ހިމެނެއެވެ.
ކެއާޓޭކަރ ސަރުކާރުން އުފެއްދި ކޮމިޝަން އޮފް އިންކުއަރީ އިން އެންފޯސްޑް ޑިސްޕެއަރެންސް އިން ބުނީ ބަންގްލަދޭޝްގެ ސިޔާސީ އިދިކޮޅު މީހުންތަކެއް ވަގަށް ނެގުމުގައި ހަސީނާ އާއި އޭނާގެ ސަރުކާރުގެ އިސް އޮފިޝަލުން ބައިވެރިވި ކަމުގެ ހެކިތައް ހޯދާފައިވާ ކަމަށެވެ.
ހަސީނާގެ ވެރިކަމުގައި އިންސާނީ ހައްގުތަކާ ހިލާފު އަމަލުތަކުގައި ބައިވެރިވި ކަމަށް ރިޕޯޓްތަކާ ގުޅިގެން އެމެރިކާއިން 2021 ވަނަ އަހަރު ރެޕިޑް އެކްޝަން ބެޓޭލިއަން އާއި އެ ބެޓޭލިއަންގެ އިސް ހަތް އޮފިސަރުންނަށް ދަތިކުރުމުގެ ފިޔަވަޅުތައް އަޅާފައިވެ އެވެ.
