ބޭންކް އޮފް މޯލްޑިވްސް (ބީއެމްއެލް) އިން 700 މިލިއަން ރުފިޔާގެ އޯވަރޑްރާފްޓެއް އާންމު އުސޫލުތަކާ ޚިލާފަށް ދޫކޮށްފައިވާ ކަމަށް ބުނެ ފަތުރަމުންދާ ވާހަކަތައް އެ ބޭންކުން ދޮގުކޮށްފިއެވެ.
މިކަމާ ގުޅޭގޮތުން ބީއެމްއެލްއިން ނެރުނު ބަޔާނެއްގައި ބުނެފައިވަނީ، އޮންލައިން ނޫހެއްގައި އެ ބޭންކުގެ އިތުބާރު ގެއްލޭފަދަ ގޮތަކަށް ޚަބަރު ޝާއިޢުކޮށްފައިވާތީ އެކަން ކުށްވެރިކުރާ ކަމަށެވެ. އަދި ބޭންކުން ކަސްޓަމަރުންނަށް ޚިދުމަތް ދެމުން އަންނަނީ ބޭންކިންގ ޤާނޫނާއި، އެ ޤާނޫނުގެ ދަށުން ހެދިފައިވާ ގަވާއިދުތަކާއި، އިންޓަރނޭޝަނަލް ބެސްޓް ޕްރެކްޓިސްތަކާ އެއްގޮތްވާ ގޮތުގެ މަތިން ކަމަށް ބީއެމްއެލްއިން ބުންޏެވެ.
ބަލްކު ޓްރާންސްފަރގެ ޚިދުމަތާއި ގުޅޭގޮތުން ބީއެމްއެލްއިން ބުނެފައިވަނީ، މި ޚިދުމަތް ސަރުކާރުގެ އިދާރާތަކާއި، ކުންފުނިތަކާއި، އަމިއްލަ ކުންފުނިތަކާއި ވިޔަފާރިތަކަށް ދެމުން އަންނަނީ އާންމު އުސޫލުތަކާއި އެއްގޮތަށް ކަމަށެވެ.
މީގެއިތުރުން، ބޭންކުގެ އެންމެ މަތީ މަސްލަޙަތަކީ ޑިޕޮސިޓަރުންގެ ރައްކާތެރިކަން ކަމަށާއި، ބޭންކުން އަބަދުވެސް ޢަމަލުކުރަމުންދާނީ ބޭންކުން ޢަމަލުކުރަމުންދާ ހަރުދަނާ އުސޫލުތަކާ އެއްގޮތަށް ކަމަށް ބީއެމްއެލްއިން ބުންޏެވެ.
