ދިވެހި މަސްދޯނިފަހަރުގައި ޔަންމާ އިންޖީނު އެޅިތާ 50 އަހަރު ފުރުމުގެ މުނާސަބަތުގައި އެމްޓީސީސީން އިންތިޒާމުކޮށްގެން ޚާއްޞަ ފޯރަމެއް ބާއްވައިފިއެވެ. މި ފޯރަމްގައި ޔަންމާ އިންޖީނާއި، އޮޑިދޯނިފަހަރުގައި ބޭނުންކުރެވޭނެ ފަހުގެ ޓެކްނޮލޮޖީއާބެހޭ މަޢުލޫމާތު ދީފައިވެއެވެ.
ފޯރަމްގައި މަޢުލޫމާތު ދެއްވީ ޔަންމާ އޭޝިއާ ސަރަހައްދުގެ މެނޭޖިން ޑައިރެކްޓަރ ޖެކްސަން ޓާންއެވެ. އޭނާ ވިދާޅުވި ގޮތުގައި ޔަންމާ އިންޖީނެއް ދިވެހި މަސްދޯންޏެއްގައި އެޅުމަކީ ދިވެހި މަސްވެރިކަމުގެ ސިނާޢަތަށް ބޮޑު ކުރިއެރުމެއް ގެނެސްދިން ކަމެކެވެ.
"އަޅުގަނޑު އުންމީދުކުރަނީ މި ފޯރަމްގެ ސަބަބުން އޮޑިފަހަރުގެ ވެރިންނަށް މާކެޓުގައި މިވަގުތު ހުރި އިންޖީނުތަކާބެހޭ މުހިންމު މަޢުލޫމާތުތަކެއް ލިބޭނެ ކަމަށް،" ޓާން ވިދާޅުވިއެވެ.
އެމްޓީސީސީން މަޢުލޫމާތު ދެއްވި ގޮތުގައި ފޯރަމްގައި ބާޒާރުގައި މިހާރު ހުރި އިންޖީނުތަކާއި، އެއަށް ދިމާވާ އެކި މައްސަލަތަކާއި އޭގެ ހައްލާ ބެހޭގޮތުން މަޢުލޫމާތު ދީފައިވެއެވެ. އަދި މިފަހުން ޤާއިމްކުރަން ފެށި ލޮނުފެނުން މަސް ފިނުކުރާ ނިޒާމު ހަރުކުރުމާއި ބެހޭގޮތުންވެސް މުހިންމު މަޢުލޫމާތުތަކެއް ދީފައިވެއެވެ.
ރާއްޖޭގެ މަސްކަނޑުތަކުގައި އެންމެ ފުރަތަމަ ޔަންމާ އިންޖީނު އެޅި ދޯނި "އުއްމީދު" ބޭލީ 1974 ވަނަ އަހަރުއެވެ. މިއީ ދިވެހި މަސްވެރިކަމަށް އުއްމީދު ގެނެސްދިން ދަތުރަކަށް ވެފައިވެއެވެ. އޭގެފަހުން ޔަންމާ އިންޖީނުގެ އަވަސްކަމާއި ކުޅަދާނަކަމާއި އެ އިންޖީނުން ލިބިދޭ ގިނަގުނަ ލުއިފަސޭހަތައް ވިސްނުނު ހިސާބުން، ޔަންމާ އިންޖީނު ދިވެހި މަސްވެރިންގެ މެދުގައި މަޤްބޫލު ބްރޭންޑަކަށް ވެގެން ގޮސްފައިވެއެވެ.
