އެމްޑީޕީގެ ވެރިކަމުގައި އެންމެ ފުރަތަމަވެސް މަސައްކަތް ފެށީ އިސްލާމް ދީނާއި ރަސޫލާއަށް ހަޖޫ ޖަހާ މީހުން ޙިމާޔަތް ކޮށް، ފާފައަށް އަރައި ޤައުމުގެ ދީނީ މަސްލަޙަތު ގެއްލުވައިލި އެމްޑީއެން ކިޔުނު ޣައިރު މުސްލިމް ޖަމާޢަތަކަށް ޚާއްޞަ އިނާޔަތްތަކެއް ދޭށެވެ. އެގޮތުން ދައުލަތުގެ މުހިންމު މަޤާމުތަކުގައި އެމްޑީއެންގެ މީހުން ބޭތިއްބެވިއެވެ. އޭގެތެރޭގައި ޕީޖީ އާއި ޕޮލިސްގެ އެންމެ އިސް ވެރިޔަކަށް ބޭތިއްބީ އެމްޑީއެންގެ މީހުންނެވެ. މިދެންނެވީ އިބްރާހީމް މުޙައްމަދު ޞާލިޙްގެ ވެރިކަމެވެ. އޭގެކުރިން އެމްޑީޕީގެ އެންމެ ފުރަތަމަ ވެރިކަމަށް ބަލައިލި ކަމުގައި ވިޔަސް ފެންނާނީ ހަމަ އެފަދަ މަންޒަރެވެ. ސިއްރިޔާތުގައި އެމްޑީޕީގެ ވެރިކަމުގައި ދިޔައީ ޔަހޫދީ އިސްރާއީލާއި ގުޅުން ބަދަހިކުރަމުންނެވެ.
އެމްޑީޕީގެ ވެރިކަމުގައި ފޮރިން މިނިސްޓަރު އަޙްމަދު ނަސީމް އޭރުގެ އިސްރާއީލުގެ ފޮރިން މިިނިސްޓަރާއެކު ޖެރޫސެލަމް ގައި.
އެމްޑީޕީގެ އެންމެ ފުރަތަމަ ސަރުކާރުގައި އިސްރާއީލާއި ގުޅުން ބަދަހިކުރުމުގެ ތެރެއިން ހެދިފައިވާ އަޑި ނޭނގޭ ސިއްރު އެއްބަސްވުންތަކުގެ ތެރެއިން ދިވެހި ބައެއް މަހުޖަނުންނާއި އިސްރާއީލުގެ ވިޔަފާރިވެރިންނާއި އޮންނަ ގުޅުމުގެ ސަބަބުން ރާއްޖޭގައި އިސްރާއީލުގެ ޔަހޫދީން ކޮންޓުރޯލްކުރާ އަދި ދިވެހި ބައެއް މަހުޖަނުންނާއި ގުޅިފައިވާ ރިސޯޓުތައް ވެއެވެ. އެމްޑީޕީއަކީ އޭރުވެސް އަދި މިހާރުވެސް މަހުޖަނުންގެ ފިޔަ ދަށުގައި ޙިމާޔަތް ލިބިގެން އޮންނަ ޕާޓީއެކެވެ. އެހެންކަމުން މަހުޖަނުންގެ މަސްލަޙަތު ޙިމާޔަތް ކުރުމަށްޓަކައި ކުރާން ޖެހުނު ކޮންމެ ކަމެއް އެމްޑީޕީން ކުރާނެއެވެ. ސަބަބަކީ އެމްޑީޕީ ވެރިކަމަށް ގެނައުމުގައި ޚަރަދު ކުރަނީ މަހުޖަނުންނެވެ. އެހެންކަމުން މަހުޖަނުންނަށް ރިސޯޓުގެ ކުލި މަޢާފް ކޮށްދިނުމާއި މީރާއަށް ދައްކަންޖެހޭ އެހެނިހެން ޓެކްސްތައްވެސް އެމްޑީޕީ ސަރުކާރުގައި އަބަދުވެސް މަޢާފް ކޮށްދެއެވެ. އަދި މަހުޖަނުން ރުއްސުވަންވެގެން އިސްރާއީލާއި ރާއްޖެއާއި ދެމެދު ޑައިރެކްޓު ފުލައިޓު އޮޕަރޭޓްކޮށް އިސްރާއީލް ފަތުރުވެރިންނަށް ޙިމާޔަތް ދޭނެ އިސްރާއީލްގެ ސިފައިން ވެސް ރާއްޖޭގައި ބޭތިއްބުމަށް އެމްޑީޕީގެ މަތީ ފަޑި އޮތީ ތައްޔާރަށެވެ. އެކަމާމެދު ބިރުގަތީ އޭރުގެ ސިވިލްއޭވިއޭޝަން މިނިސްޓަރު މަހުމޫދު ރާޒީއެވެ. ރާޒީއަށް ވިސްނުނީ މެދުއިރުމަތީގެ މަޝްރަހުގެ ސަބަބުން ރާއްޖެއަށް އޭގެ ނުރައްކާ އަތުވެދާނެ ކަމެވެ.
އިސްރާއީލްގެ ސިފައިންނާއި އިންޓެލިޖެންސް އޮފިސަރުން ހަތިޔާރާއިއެކު ރާއްޖޭގައި ބޭތިއްބުމަށް ޓެލްއަވީވުން އެދިފައިވާތީވެ، އޭރުގެ ސިވިލްއޭވިއޭޝަން އެންޑް ކޮމިއުނިކޭޝަން މިނިސްޓަރު މަހްމޫދު ރާޒީ ރައީސް ނަޝީދަށް ފޮނުވި ސިއްރު ސިޓީ.
އެމްޑީޕީ އަކީ ބައެއް މަހުޖަނުން ބުނެފިނަމަ އެކަން ނުކޮށް ދޫކޮށްލާނެ ބައެއް ނޫނެވެ. އެމްޑީޕީ އަށް އަބަދުވެސް ވެރިކަން ހޯދައިދެނީ މަހުޖަނުންނެވެ. އެހެންވެ، މަހުޖަނުން ދައުލަތަށް ދައްކަން ޖެހޭ ޓެކުހެއް ވިއްޔާ އެމްޑީޕީ ސަރުކާރުން އަބަދުވެސް މަޢާފް ކޮށްދެއެވެ. މަހުޖަނުންނަށް އެމްޑީޕީގެ ވެރިކަމުގައި ރިސޯޓުތަކުގެ ކުލި ވެސް މަޢާފް ކޮށްދީ ޤައުމުގައި ބާކީ ހުރި ފަޅުރަށްތައް ދީ ފަޅުތައްވެސް ބަހައިލައެވެ.
އަބަދުވެސް އެމްޑީޕީ ވެރިކަމަށް ގެނައުމުގެ ފަހަތުގައި ތިބެނީ ބައެއް މަހުޖަނުން ކަމަށް ވާތީވެ، މަހުޖަނުން ބޭނުން ނުވާ ގޮތަކަށް އެމްޑީޕީން އެންމެ ފިޔަވަޅެއް ވެސް ނާޅާނެއެވެ. އަޅައިފިނަމަ އެ ވެރިކަމެއް ވައްޓާލަން އެ މަހުޖަނުން ޚަރަދު ކުރާނެއެވެ. އެމްޑީޕީގެ ފުރަތަމަ ވެރިކަމުން ރައީސް ނަޝީދު ބޭރުކޮށްލުމުގައި ވެސް އަސްލު އެންމެ އަޑީގައި ތިބީ މިދެންނެވި ބައެއް މަހުޖަނުންނެވެ. އޭގެތެރޭގައި ކަސްޓަމްސް ޑިއުޓީ އާއި ޓެކުހާއި ގުޅޭ މައްސަލަ ތަކާއި އަދި ދޭނަމޭ ބުނި ހުރިހާ ރަށްތަކާއި ބިންތައްވެސް ބުނި މިންވަރަށް ދީފައި ނުވާތީ ޖެހުނު މައްސަލަތައް ހިމެނެއެވެ. އެމްޑީޕީގެ ވެރިކަން ވައްޓާލީ އެއްވެސް ޙާލެއްގައި ޤާޟީ ވަގަށް ނަގައިގެނެއް ނޫނެވެ. އެއީ ދައްކާލި ޙުއްޖަތެކެވެ. އަސްލަކީ މަހުޖަނުން ބޭނުންވި ގިނަ ކަންތަކާއި ރައީސް ނަޝީދު ފަހުވަގުތު ޚިލާފުވެ އެހެން ގޮތަކަށް ވަކި ބަޔަކަށް ބައި އެޅުމެވެ. މަހުޖަނުންނަށް ދޭންހުރި ރަށްތައްވެސް އެކްޓިވިސްޓުންނަށް ދިނީމައެވެ. މިއީ ރައްޔިތުންނަށް ފަހަރުގައި ކުރިން ނޭނގިފައިވާ ކަމަކަށް ވެދާނެއެވެ.
ކޮންމެޔަކަސް، އެމްޑީޕީއަކީ އަބަދުވެސް ވިޔަފާރިވެރިންގެ ކޮންޓުރޯލް ދަށުގައި އޮތް ސިޔާސީ ޕާޓީއެކެވެ. މަހުޖަނުން ބޮޑާހޭކީމައި ވާނެ ގޮތް އެމްޑީޕީއަށް އޮތީ ފެނިފައެވެ. އެހެންކަމުން އެމްޑީޕީއަށް އަބަދުވެސް މުހިންމުވާނީ ވިޔަފާރިވެރިންގެ މަސްލަޙަތެވެ. ޤާނޫނު އަސާސީ ޙިމާޔަތް ކުރުމުގެ ނަމުގައި މިހާރު އެމްޑީޕީން ރާވަމުންދާ ޖަލްސާއަކީ ވެސް މިދެންނެވި މަހުޖަނުން ޙިމާޔްކުރުމަށް ބާއްވާ ޖަލްސާއެކެވެ. ސަބަބަކީ އެމްޑީޕީގެ ވެރިކަމުގައި ބައެއް މަހުޖަނުން އަތުން ކުލި ނުނަގައި، ޓެކްސް ވެސް ނުދައްކައި ހިންގި ރިސޯޓުތަކުން މިސަރުކާރުގައި ކުލި ނަގަން ފެށުމުންނެވެ. ޓެކްސް ނުދައްކައި ފިލާތިބި މަހުޖަނުންގެ އަތުން ސަރުކާރަށް ޓެކްސް ދައްކަން މި ސަރުކާރުންލާޒިމް ކުރާތީއެވެ. ރިސޯޓުތަކަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރަން މިސަރުކާރުން މަޖުބޫރު ކުރާތީއެވެ. ރައީސް ޑރ. މުޢިއްޒު ވިސްނާވަޑައިގަންނަވަނީ މަހުޖަނުންގެ އެކަނި ފައިދާއަކަށް ނޫނެވެ. މިސަރުކާރުން މަސައްކަތް ކުރަނީ މަހުޖަނުން އަޑީގައި ތިބެގެން ކޮންޓުރޯލްކުރާ ޑޮލަރުގެ ބުލެކް މާކެޓު ނައްތާލުމަށާއި، ޓެކްސް އަށް މަކަރުހަދާ ރިސޯޓުތައް ދެނެގަތުމަށެވެ. ރިސޯޓުތަކަށް އަންނަ މީހުންގެ މަޢުލޫމާތު މި ސަރުކާރަށް ހުށަހަޅަން ޖެހެއެވެ. މިއީ މަހުޖަނުން ބޭނުންވާ ގޮތެއް ނޫނެވެ. މަހުޖަނުން ބޭނުންވަނީ ރިސޯޓުތަކުން ނަގާ ޓެކްސް ކުޑަކުރާށެވެ. އަދި އެތަނަށް އަންނަ ޔަހޫދީންގެ މަޢުލޫމާތުތައް ވެސް ސިއްރު ކުރާށެވެ. މިދެންނެވި މަހުޖަނުން ދެކޭ ގޮތުގައި ރިސޯޓުތަކުން ކޮންމެ ބޮލަކަށް 500 ޑޮލަރު ނަގާކަމަށްވާނަމަ ޢާންމު ރައްޔިތުން އަތުން ނަގާ ޖީއެސްޓީގެ މިންވަރު ބޮޑުކުރަން ޖެހެއެވެ. ނަމަވެސް ސަރުކާރުން ޖީއެސްޓީ ބޮޑުކުރުމާއި ދެކޮޅެވެ. އެހެންވެ ޤާނޫނު އަސާސީގެ ނަމުގައޭ ބުނެ އެމްޑީޕީ މެދުވެރިކޮށް ރައްޔިތުން މަގުތަކަށް ނެރެ ހަމަނުޖެހުން ހިންގުމަށް މަސައްކަތް މިކުރަނީ މިދެންނެވި މަހުޖަނުން އަޑީގައި ތިބެގެންނެވެ.
ރާއްޖޭގެ ބައެއް މަހުޖަނުން - އެމްޑީޕީއަށް ފައިސާ ދީގެން ޤާނޫނު އަސާސީ ދިފާޢު ކުރުމަށޭ ކިޔައި މަހުޖަނުންތަކެއް ވަނީ އެމްޑީޕީ އަށް ފައިސާ ދީގެން ރާއްޖޭގެ ހަމަޖެހުން ނަގައިލުމަށް ހިއްވަރުދީފަ. ބޭނުމަކީ ޑޮލަރު މައްސަލަ އަނބުރާ ގެންދިޔުން.
އެމްޑީޕީން މިމަހުގެ 10ވަނަ ދުވަހު ބާއްވަން އުޅޭ ޖަލްސާއަށް ޚަރަދު ކުރަނީވެސް މަހުޖަނުންނެވެ. ރަށްރަށުން މީހުން ގެންނަން ފައިސާ ދެނީ މަހުޖަނުންނެވެ. މި ޖަލްސާގެ އަސްލު މަޤްޞަދަކީ އެ މަހުޖަނުން ޙިމާޔަތް ކުރުމެވެ. އޭގެތެރޭގައި މިދެންނެވި މަހުޖަނުންނާއި ގުޅިފައިވާ ބޭރުގެ ޔަހޫދީ މަހުޖަނުންނާއި ކުރިސްޓިއަން މަހުޖަނުންގެ މަސްލަޙަތު ވެސް ހިމެނެއެވެ.
ރާއްޖޭގެ އިޤްތިޞާދު ކުރިއަރުވައި އަލަށް އުފެދިގެން އަންނަ ޒުވާން ވިޔަފާރިވެރިންނަކީ ރިސޯޓު އޯނަރުންނަށް ވުމަށް މިދެންނެވި ރިސޯޓު ވެރިން ދެކޮޅު ހަދައެވެ. އަދި އިޤްތިޞާދު ހަރުދަނާކުރުމަށް ސަރުކާރުން އަޅާ ފިޔަވަޅުތަކާއި އަބަދުވެސް އެމީހުން ދެކޮޅު ހަދައެވެ. އެމީހުންނަށް ލިބޭ އާމްދަނީ ރާއްޖޭގެ ބޭންކިންގ ނިޒާމުގައި ޖަމާކުރުމުގެ ބަދަލުގައި ބްލެކް މާކެޓުގައި ޑޮލަރު ވިއްކައިގެން އެއިން ލިބޭ އިތުރު ޢާމްދަނީ، ހަމަނުޖެހުން ހިންގުމަށްއެމްޑީޕީގެ ކަންކަމަށް ޚަރަދުކުރާ މަހުޖަނުންވެސް އެބަ އުޅެއެވެ.
ރިސޯޓުތަކުން ފަތުރުވެރިކަމުން ލިބޭ އާމްދަނީގެ ކުޑަ ބައެއް ރާއްޖޭގެ ބޭންކުތަކުގައި ޖަމާކުރަން ޖެހޭގޮތަށް ސަރުކާރުން ނިންމާފައިވާ ނިންމުމަކީ މި އިޤްތިޞާދީ ފަސާދަ ހުއްޓުވުމަށް އަޅާފައިވާ ފިޔަވަޅެކެވެ. ނަމަވެސް މިކަމުގެ ސަބަބުން މަހުޖަނުންގެ ޖީބަށް ވަންނަ އެތިކޮޅެއް ގެއްލިގެންދާތީ އާއި އެމްޑީޕީއަށް ލިބޭ ކޮމިޝަން މަދުވެދާނެތީވެ، ސަރުކާރުގެ މި ފިޔަވަޅާއި އެމީހުން ދެކޮޅު ހަދައެވެ.
ޤާނޫނުއަސާސީގެ ޙިމާޔަތުގައޭ ކިޔައި އެމްޑީޕީން މިއަދު އެދައްކާ ވާހަކައަކީ ރައްޔިތުންގެ "ބޯ ކާލަން" ދައްކާ ވާހަކަތަކެވެ. އެމްޑީޕީ ވެރިކަމުގައި އޮތް ދުވަސްވަރު، މިހާރު އެ ޕާޓީން ދިފާޢުކުރަން ބުނާ ޤާނޫނުއަސާސީ ހިމާޔަތްކުރުމަށް މަސައްކަތް ނުކުރެއެވެ. އެމްޑީޕީން ފަނޑިޔާރުގެއަށް ނުފޫޒު ފޯރުވީއެވެ. އެމްޑީޕީގެ މީހަކާއި ދެކޮޅަށް ޙުކުމެއް އިއްވައިފި ފަނޑިޔާރަކުނަމަ ކޮންމެވެސް މޮޅު އެއްޗެކޭ ބުނެ ފަނޑިޔާރުކަމުން ކަނޑައި ވަކިކޮށްލާފައި އެމްޑީޕީގެ އެކްޓިވިސްޓުން ޖުޑިޝަރީ ތެރެއަށް ވެއްދީއެވެ. ބައެއް ފަނޑިޔާރުން ވަކިކޮށްލީ އިސްތިއުފާ ދިނުމަށް ފުރުސަތު ނުދީ، ފޮނުވާފައިވާ ސިޓީތަކަށް ޖަވާބު ވެސް ނުދީ މަޖިލިސް މެދުވެރިކޮށްގެން ކަން ވެސް ފާހަގަ ކުރެވެއެވެ. އެހެންކަމުން ޤާނޫނާއި ޚިލާފަށް ކަންކަން ކޮށްފައި ޤާނޫނޭ ކިޔާކަށް އެމްޑީޕީއަކަށް ޖާގައެއް ނެތެވެ، އެމްޑީޕީއަށް މުހިންމީ ރައްޔިތުންނެއް ނޫނެވެ. އެމްޑީޕީއަށް މުހިންމީ މަހުޖަނުންނެވެ. މިހާރު އެމްޑީޕީން މުޒާހަރާތައް ރާވައި، ރައްޔިތުން އޮޅުވާލަން މަސައްކަތް ކުރިޔަސް މިއީ މަހުޖަނުން އަޑީގައި ތިބެގެން ހިންގާ ކަންކަމެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުން ޤައުމުގެ އިޤްތިޞާދީ ގޮންޖެހުންތަކަށް ހައްލު ހޯދުމަށް އައު ސިޔާސަތުތަކެއް ތަޢާރަފުކޮށް، ފަތުރުވެރިކަމުގެ އާމްދަނީން މުޅި ޤައުމަށް ފައިދާވާނެގޮތަށް މި ފިޔަވަޅުތައް އަޅާފައިވަނީ އިޤްތިޞާދު ހަރުދަނާކޮށް، ބޭންކިންގ ދާއިރާ ވަރުގަދަކޮށް، ޢާންމު ރައްޔިތުންގެ ދިރިއުޅުން ފަސޭހަކުރުމަށެވެ. އެމްޑީޕީއާއި އެ ޕާޓީގެ މުގުލުގައި ތިބި ރިސޯޓު އޯނަރުން މިކަންތަކާއި ސީދާ ދެކޮޅު ހަދައެވެ.
އެމްޑީޕީގެ ޖަލްސާއަކީ ޤާނޫނުއަސާސީ ދިފާޢުކުރުމަށް ބާއްވާ ޖަލްސާއެއް ނޫނެވެ. އެއީ މަދު ބައެއްގެ މަސްލަހަތު ހިމާޔަތްކުރުމަށް ބާއްވާ ޖަލްސާއެކެވެ. އެމްޑީޕީގެ އިސް ސަފުގައި ރިސޯޓު ހިއްސާ ނޯންނަ މީހަކު މަދުވާނެއެވެ. ޤާނޫނުއަސާސީގެ ދިފާޢުގައޭ ބުނެ ރައްޔިތުން އޮޅުވާލައި އެމްޑީޕީން މަސައްކަތް މިކުރަނީ މަހުޖަނުން ދިފާޢު ކުރުމަށެވެ. އެމީހުން ހިންގާ މަނީ ލޯންޑްރިން އާއި ޓެކްސްއަށް ހަދަމުންދާ މަކަރު ފަޅާއަރާނެތީވެ، ޤާނޫނުއަސާސީގެ ޙިމާޔަތުގައޭ ބުނެ ނުކުންނަނީއެވެ.
