އަލްޚުލަފާއުއްރާޝިދޫންގެ މަތިވެރިކަމާއި އެބޭކަލުންގެ ސީރަތުން ފިލާވަޅު ލިބިގަންނަން ޖެހޭކަމަށް މިއަދުގެ ހުކުރު ޚުތުބާގައި ބުނެފިއެވެ.
ޚުޠުބާގައި ބުނީ، އަލްޚުލަފާއުއްރާޝިދޫންއަކީ، މާތް ނަބިއްޔާގެ ޚަލީފާކަން ކުރެއްވި ހަތަރު އަޞްޙާބުބޭކަލުންކަމުގައިވާ أَبُوْ بَكْر (رَضِيَ اللّٰهُ عَنْهُ) އާއި، عُمَرُ (رَضِيَ اللّٰهُ عَنْهُ) އާއި، عُثْمَانُ (رَضِيَ اللّٰهُ عَنْهُ) އާއި عَلِي (رَضِيَ اللّٰهُ عَنْهُ) މި ހަތަރު ބޭކަލުން ކަމަށެވެ. މި ބޭކަލުންނަކީ ނަބިއްޔާ مُحَمَّدٌ ﷺ، އެބޭކަލުންނަށް ތަބާވުމަށް އިރުޝާދުދެއްވައިފައިވާ ބޭކަލުންކަމަށް ޚުތުބާގައި ބުންޏެވެ.
ޚުތުބާގައި ބުނީ އަބޫބަކުރުގެފާނުގެ ސީރަތުން ލިބޭ މުހިންމު ފިލާވަޅަކީ އީމާންކަމުގައި ސާބިތުވެ ތިބުންކަމަށެވެ. މާތް ނަބިއްޔާގެ އިސްރާއާއި މިޢުރާޖުގެ ޙާދިޘާގައި އެކަލޭގެފާނު ދެއްކެވި ސާބިތުކަމަކީ މިކަމުގެ އެންމެ ރަނގަޅު މިސާލުކަމަަށް ޚުތުބާގައި ބުންޏެވެ. ޢުމަރުގެފާނުގެ ސީރަތުން ލިބޭ މުހިންމު ފިލާވަޅަކީ އިޞްލާޙުވުމުގެ ދޮރު އަބަދުވެސް ހުޅުވިފައިވާކަމާށާއި އެކަލޭގެފާނު އިސްލާމްވެވަޑައިގަތުމުގެ ކުރިން މުޝްރިކުންގެ ތެރެއިން އެންމެ ޢަދާވާތްތެރި އެއް ބޭކަލަކަށް ވެފައި، އިސްލާމްވުމަށްފަހު ދީނުގެ އެންމެ ވަރުގަދަ ދިފާޢީ ބޭކަލަކަށް ވެވަޑައިގަތުމަކީ މިކަމުގެ ހެއްކެއް ކަމަށްވެސް ޚުތުބާގައި ބުންޏެވެ.
ޚުތުބާގައި ބުނިގޮތުގައި، ޢުޘްމާނުގެފާނުގެ ސީރަތުން ލިބޭ މުހިންމު ފިލާވަޅަކީ އަޚްލާޤު ރިވެތިކޮށް މުޖުތަމަޢަށް މަންފާކުރުމެވެ. އެކަލޭގެފާނުގެ ލަދުވެތިކަމާއި ދީލަތިކަމަކީ މުޅި އިސްލާމީ އުންމަތަށް ނަމޫނާއެއް ކަމަށް ޚުތުބާގައި ބުންޏެވެ. އަދި ޢަލީގެފާނުގެ ސީރަތުން ލިބޭ މުހިންމު ފިލާވަޅަކީ ހިތްވަރުގަދަކަމާއި ޤިޔާދަތު ކަމަށާއި، ހަނގުރާމައިގެ މައިދާނުގައްޔާއި، ޚަލީފާކަމުގައި ބޮޑެތި ފިތުނަތަކެއްގެ ތެރޭގައި އެކަލޭގެފާނު ދެއްކެވި ޤިޔާދަތާއި ހިތްވަރަކީ ތާރީޚު ހެކިދޭ ކަންކަން ކަމަށް ޚުޠުބާގައި ފާހަގަކުރިއެވެ.
މި ބޭކަލުންގެ ސީރަތުން ފިލާވަޅު ލިބިގަނެ، ޢަމަލީ ގޮތުން ތަޠްބީޤުކުރުމަކީ މުހިންމު ކަމެއްކަމަށާއި، މިއީ މުސްލިމުންގެ މައްޗަށް ވާޖިބުވެގެންވާ ކަމެއްކަމަށް ވެސް ޚުތުބާގައި ބުންޏެވެ. އަދި މިކަމުގެ ސަބަބުން އަމިއްލަ ނަފްސަށާއި މުޅި މުޖުތަމަޢަށް ލާބަޔާއި މަންފާ ލިބި، އިސްލާމީ އުންމަތް ކުރިއަރައި ދިއުމަށް މަގުފަހިވާނެކަމަށް ޚުތުބާގައި ބުންޏެވެ.
ޚުތުބާގައި އިތުރަށް ބުނީ އިސްލާމްދީނާ މެދު ޝައްކާއި ވަހުމުތައް އުފައްދައި ފަތުރަމުންދާ މި ޒަމާނުގައި، އަބޫބަކުރުގެފާނު ދެއްކެވި ފަދަ ސާބިތުކަމެއް މުސްލިމުން ދައްކަން ޖެހޭކަމަށެވެ. މީހަކު، އެ މީހެއްގެ ކޮށި ވިސްނުން ޙުއްޖަތަކަށް ހަދައި، މުސްލިމުންގެ ސިކުނޑި ދޮވެލުމަށްޓަކައި ދައްކާ ވާހަކައަކުން، ޤުރްއާނާއި ސުންނަތުން ސާބިތުވާ، އިސްލާމް ދީނުގެ އަސާސަކާ މެދު ޝައްކު އުފައްދައިގެން ނުވާނެކަމަށް ޚުތުބާގައި އިރުޝާދު ދިނެވެ.
އަދިއެހެންމެ، ޢުމަރުގެފާނުގެ ސީރަތުން ފިލާވަޅު ލިބިގަނެ، ތިމާއަކީ މާޒީގައި ކުށްތަކަށް އަރައިގަތް މީހެއްކަމުގައި ވިޔަސް، އިސްލާޙުވެ ދީނަށާއި އުންމަތަށް ޚިދުމަތްކުރުމަކީ ހުޅުވިފައިވާ ދޮރެއްކަން ހަނދާންކުރަންވާނެ ކަމަށް ޚުތުބާގައި ބުންޏެވެ. ކިތަންމެ ބޮޑެތި އަދި ކިތަންމެ ބައިވަރު ފާފަތަކެއް ކުރެވިފައިވީ ނަމަވެސް އިސްލާޙުވާން ބޭނުންވާ މީހަކަށް މަގު ފަހިވެފައިވާކަން މާތް ﷲ އަންގަވާފައިވާ ކަމަށްވެސް ޚުތުބާގައި ބުންޏެވެ.
ހަމައެހެންމެ، ޢުޘްމާނުގެފާނު ފަދައިން އަޚްލާޤީ ރިވެތި ސިފަތައް އަށަގަނެ، މުޖުތަމަޢަށް މަންފާކުރަނިވި ބަޔަކަށްވުމަށް މަސައްކަތްކުރުމަކީ މުހިންމު ކަމެއްކަމުގައި ޚުތުބާގައި ބުންޏެވެ. އަދި ތަނަވަސްކަން ލިބިފައިވާ މީހުން ޒަކާތް ނެރެ، ނިކަމެތީންނަށް އެހީވެ، މީހުން ބިނާކުރުން ފަދަ މުޖުތަމަޢަށް ފައިދާ ކުރަނިވި ކަންކަމަށް ހޭދަކުރުމަށް ޚުތުބާގައި އިރުޝާދު ދެއްވިއެވެ.
ޚުތުބާގައި ބުނީ، މުސްލިމުންނަކީ ވެސް ދީނުގެ ދިފާޢުގައި މަސައްކަތްކުރާ ބަޔަކަށް ވާންޖެހޭ ކަމަށެވެ. ޒަމާނާއެކު އަންނަ ގޮންޖެހުންތަކާ، ކެރިގެން ކުރިމަތިލާ ބަޔަކަށް ވާންޖެހޭ ކަމަށާއި، ކަޅު ފޮއި ރެއެއްގެ އަނދިރިކަން ފަދަ ފިތުނަވެރި ދުނިޔެއެއްގައި އަހަރެމެން ދިރިއުޅެމުންދާ އިރު، ޙައްޤު މަގުގައި ކެރިގެން ފައިތިލަ ސާބިތު ކުރާންޖެހޭ ކަމަށް ޚުތުބާގައި ބުންޏެވެ.
އަލްޚުލަފާއުއްރާޝިދޫންގެ ސީރަތުން ފިލާވަޅު ލިބިގަނެ، އެ ބޭކަލުންގެ މަތިވެރި ސިފަތައް އަމިއްލަ ދިރިއުޅުމުގައި ތަޠްބީޤުކުރުމަކީ ކޮންމެ މުސްލިމެއްގެ މައްޗަށް ވާޖިބުވެގެންވާ ކަމެއްކަމަށް ޚުތުބާގައި ބުންޏެވެ. އަދި މިކަމުގެ ސަބަބުން އަމިއްލަ ނަފްސަށާއި މުޅި މުޖުތަމަޢަށް ލާބަޔާއި މަންފާ ލިބި، އިސްލާމީ އުންމަތް ކުރިއަރައި ދިއުމަށް މަގުފަހިވާނެކަމަށް ޚުތުބާގައި ވަނީ ބުނެފައެވެ.
