ދިވެހި ޖޯލިފަތި ޖަޕާނު މީހުންނަށް ކަމުގޮސްގެން އެގައުމުގައި ޖޯލިފައްޗެއް ހަދައި ބަހައްޓައިފިއެވެ.
ރާއްޖޭގައި ހުންނަ ޖަޕާން އެމްބަސީން ބުނި ގޮތުގައި، ޖަޕާނުގައި ޖޯލިފަތި ބަހައްޓަން ބޭނުންވީ ރާއްޖެއަށް ކުރި ދަތުރެއްގައި ޖޯލީގެ އަރާމުކަން ތަޖުރިބާ ކޮށްފައިވާތީ ކަމަށެވެ. އެމީހުންނަށް ރާއްޖޭގައި ބޭނުންކުރާ ޖޯލިފަތި ފެނި، އެމީހުންގެ ބައެއް އެކުވެރިންގެ އެހީއާއެކު، އަމިއްލައަށް ޖޯލިފަތި ހަދާފައިވާ ކަމަށް އެމްބަސީން ބުންޏެވެ.
މި ޚަބަރު އާންމުވުމާއެކު، ދިވެހިންގެ ސަމާލުކަން މިކަމަށް ލިބި، ގިނަ ބަޔަކު ދަނީ މިކަމާއި ގުޅޭ ޕޯސްޓްތަކަށް ކޮމެންޓް ކުރަމުންނެވެ. ޖަޕާނުގައި ބަހައްޓާފައިވާ ޖޯލިފަތީގެ ފޮޓޯތަކުން އެނގޭ ގޮތުގައި، އެމީހުން ވެސް ޖޯލިފަތި ބަހައްޓާފައިވަނީ ހިތްފަސޭހަ ތަނެއްގައެވެ.
Now you can find Joali in Japan! Japanese travelers visiting the Maldives found the traditional Maldivian bench, "Joali", very comfortable 😊 They loved it so much that they made own Joali with a help of their friends in Japan! 🪑🌴 How wonderful! pic.twitter.com/RJgaOOPdo6
ދިވެހިރާއްޖޭގައި ޖޯލިފަތި ބޭނުންކުރުމަކީ ވަރަށް އާންމު ކަމެކެވެ. އާއްމުކޮށް ދިވެހި ކޮންމެ ގެއެއްގައި ޖޯލިފައްޗެއް ހުރެއެވެ. މާލެ އާއި ރާއްޖޭގެ ހުރިހާ ރަށެއްގައިވެސް މިއީ އާއްމުކޮށް ފެންނަ މަންޒަރެކެވެ. ބައެއް ރަށްރަށުގައި މަގުމަތީގައި ޖޯލިފަތި ނުބެހެއްޓޭ ގޮތަށް ހަދާފައި ވީނަމަވެސް، އަނެއްބައި ރަށްރަށުގެ މަގުމަތީގައި ޖޯލިފަތިތައް ވަރަށް ގިނައިން ބަހައްޓާފައި ހުންނަ މަންޒަރު ފެނެއެވެ. މިފަދަ ޖޯލިފަތިތަކުގައި އިށީނދެ، އަވައްޓެރިން އެއްވެ ބޮޑެތި މަޝްވަރާތައް ކުރާ މަންޒަރު ވެސް ފެނެއެވެ.
ޖަޕާނުގައި ދިވެހި ޖޯލިފަތި ބެހެއްޓުމަކީ ދިވެހި ޘަޤާފަތް ބޭރު ޤައުމުތަކަށް ތަޢާރަފުވެގެންދާ ކަމެކެވެ. މިކަމުން ދެ ޤައުމުގެ ގުޅުން އިތުރަށް ބަދަހިވެގެންދާނެ ކަމަށް ވެސް ލަފާކުރެވެއެވެ.
