ފްރާންސްގެ ހަ އާއިލާއަކުން ސޯޝަލް މީޑިއާ ޕްލެޓްފޯމް ޓިކްޓޮކާ ދެކޮޅަށް ދަޢުވާކޮށްފިއެވެ.
މި ދަޢުވާ ކުރަނީ ޓިކްޓޮކް ޕްލެޓްފޯމުން އެ އާއިލާތަކަށް ލިބުނު ގެއްލުންތަކާ ގުޅިގެންނެވެ.
މި މައްސަލައިގައި އާއިލާތަކުން ކޯޓަށް ހުށަހެޅި ލިޔެކިޔުންތަކުގައިވާ ގޮތުން، ދެ އާއިލާއެއްގެ 15 އަހަރުގެ ދެ ކުއްޖަކު އަމިއްލައަށް މަރުވެފައިވަނީ ޓިކްޓޮކްގައި އަމިއްލައަށް މަރުވާން ހިތްވަރުދޭ އަދި ހައްދުފަހަނައަޅާ ގޮސްފައިވާ މިންވަރަށް ކެއުމަށް ބާރުއަޅާ ވީޑިއޯތަކުގެ ސަބަބުންނެވެ.
މި މައްސަލައިގައި އާއިލާތަކުގެ ވަކީލު ލޯރީ ބޯޓަން މާމަން ވިދާޅުވީ، "ޓިކްޓޮކްގެ ވެރިންނަށް ލިބޭ އަމިއްލަ މަންފާއާ ގުޅިގެން އެތައް ބަޔަކު ނުރައްކަލަށް ހުށަހެޅެމުންދޭ. ޚާއްޞަކޮށް ކުޑަކުދިންނަށް ވަރަށް ބޮޑެތި ގެއްލުންތަކެއް ވަމުންދޭ. މިއީ ޓިކްޓޮކް ޖަވާބުދާރީ ކުރުވަންޖެހޭ ކަމެއް."
މިއީ ޗައިނާގެ ކުންފުންޏެއް ކަމަށްވާ ބައިޓްޑާންސް އިން ހިންގާ ޓިކްޓޮކާ ދެކޮޅަށް ޔޫރަޕްގެ ޤައުމަކުން މައްސަލަތަކެއް ކޯޓަށް ހުށަހެޅި ފުރަތަމަ ފަހަރެވެ. މި ދަޢުވާއާ ގުޅިގެން ބައިޓްޑާންސުން އަދި ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.
މިފަދަ މައްސަލަތަކާ ކުރިންވެސް ޓިކްޓޮކްގެ އިތުރުން ފޭސްބުކް އަދި އިންސްޓަގްރާމް ހިންގާ މެޓާއަށްވެސް ކުރިމަތިލާން ޖެހިފައިވެއެވެ. އަދި މިފަދަ މައްސަލަތަކުގައި އެ ކުންފުނިތައް ބޮޑެތި އަދަދުތަކުން ޖޫރިމަނާވެސް ކޮށްފައިވެއެވެ.
