ޕާކިސްތާނުގައި ޕޯލިއޯ ބަލީގެ އިތުރު 6 ކޭސް ފެނި، މިއަހަރު އެ ޤައުމުގައި ފެނުނު މި ބަލީގެ ކޭސްތަކުގެ ޖުމްލަ އަދަދު 39 އަށް އަރައިފިއެވެ. މި 6 ކޭސްގެ ތެރެއިން 3 ކޭސް ފެނިފައިވަނީ ބަލޫޗިސްތާނުން ކަމަށްވާއިރު، 2 ކޭސް ސިންދު ޕްރޮވިންސްއިންނާއި 1 ކޭސް ހައިބަރް ޕަހްތުންހްވާއިން ފެނިފައިވާކަމަށް ވަނީ ރިޕޯޓުކޮށްފައެވެ.
ޕޯލިއޯއަކީ ކުޑަކުދިންގެ ގައިގެ ބައެއް މަސްތައް ހަލާކުވެ ވާގިނެތޭ ހާލަތަކަށް ގެންދާ، ގައިން ގަޔަށް އަރާ ނުރައްކާތެރި ބައްޔެކެވެ.
ޕާކިސްތާނުން ޕޯލިއޯ ނައްތާލުމުގެ ފޯކަލް ޕާސަން، އާއިޝާ ރަޒާ ފާރޫޤް ވިދާޅުވި ގޮތުގައި މިއީ ހުރިހާ މައިންބަފައިންނަށާއި މުޖުތަމަޢުތަކަށް އިންޒާރެކެވެ. މި ބަލި ފެތުރުން ހުއްޓުވުމަށްޓަކައި، ޕާކިސްތާނުގައި 5 އަހަރުން ދަށުގެ 45 މިލިއަނަށްވުރެ ގިނަ ކުދިންނަށް ޕޯލިއޯ ވެކްސިން ދިނުމުގެ ޤައުމީ ކެމްޕޭނެއް މި މަހުގެ 28 ވަނަ ދުވަހު ފެށުމަށް ވަނީ ހަމަޖެހިފައެވެ.
ޕޯލިއޯއަކީ ފަރުވާއެއް ނެތް ބައްޔެއް ކަމަށްވާއިރު، މި ބަލީގައި ވާގި ނެތުމަށް ފަހު ދެން އަލުން ރަނގަޅެއް ނުކުރެވެއެވެ. އެހެންކަމުން، މި ބަލިން ރައްކާތެރިވުމަށް އެންމެ މުހިންމު ގޮތަކީ ވެކްސިން ދިނުން ކަމަށް ޞިއްޙީ މާހިރުން ވަނީ އިންޒާރުދީފައެވެ
