ކުރީގެ ސަރުކާރުން ނެރެފައިވާ 4000 ފުލެޓް ލިބޭ މީހުންގެ ލިސްޓުގައި ޝަރުތު ހަމަވަނީ އެންމެ 1820 މީހުން ކަމަށާއި މިއަދު 3 ޖަހާއިރު ލިސްޓު އިޢުލާން ކުރާނެ ކަމަށް މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑޮކްޓަރ ޢަބްދުﷲ މުއްޠަލިބު ވިދާޅުވެއްޖެ،
މިވަގުތު ރައީސުލްޖުމްހޫރިއްޔާގެ އޮފީހުގައި ކުރިޔަށްދާ ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވި ގޮތުގައި، މި ސަރުކާރުން ވަރަށް ރަނގަޅަށް ބަލައި ޗެކުކުރި ކުރުމުން، ކުރީގެ ސަރުކާރުން ނެރުނު ލިސްޓުގައި ބޮޑެތި އޮޅުވާލުންތަކެއް ހުރިކަން ވަނީ ފާހަގަކުރެވިފައެވެ. މިގޮތުން، ފޯމު ނުފުރާ މީހުންނާއި، މަޢުލޫމާތު ހަމައަށް ނުދޭ މީހުންނާއި، އަދި މާލޭގައި ދިރިނޫޅޭ މީހުންގެ ނަން ވެސް އެ ލިސްޓުގައި ހިމެނިފައިވާކަން ފާހަގަކުރެއްވިއެވެ.
ސަރުކާރުން ވަނީ ޝަރުތު ހަމަނުވާ ފަރާތްތަކަށް ޝަކުވާ ހުށަހެޅުމަށް 1 މަސްދުވަހުގެ މުއްދަތެއް ދީފައެވެ. އަދި ޕޯޓަލްގައި މިހާރު ފެންނަން ހުންނާނީ ޝަރުތު ހަމަނުވާ ސަބަބު ވަރަށް ސާފުކޮށް ކަމަށް މިނިސްޓަރު ވިދާޅުވިއެވެ.
މިނިސްޓަރު ހާމަކުރެއްވި ގޮތުގައި، 4000 ފުލެޓުގެ ތެރެއިން ފުލެޓު ނުލިބޭ މީހުންނަށް ހުސްވެފައިވާ ސްލޮޓްތަކަށް ކުރިމަތިލެވޭނެއެވެ. އަދި މި ސަރުކާރުން ވަރަށް ރަނގަޅަށް ބަލައި ޗެކުކުރި ކުރުމުން، ކުރީގެ ސަރުކާރުން ނެރުނު ލިސްޓުގައި ހުރި މައްސަލަތައް ވަނީ ފާހަގަކުރައްވާފައެވެ. އެގޮތުން:
1. 3 ކޮޓަރީގެ ފްލެޓުތަކަށް:
- ކުރީގެ ސަރުކާރުން 3721 މީހުން ހިމަނާފައިވާއިރު
- ޝަރުތު ހަމަވަނީ 1423 މީހުން
2. 2 ކޮޓަރީގެ ފްލެޓުތަކަށް:
- ކުރީގެ ސަރުކާރުން 1218 މީހުން ހިމަނާފައިވާއިރު
- ޝަރުތު ހަމަވަނީ 397 މީހުން
މިނިސްޓަރު ވިދާޅުވި ގޮތުގައި، މި ވެރިފިކޭޝަން މަސައްކަތް ކުރިއަށް ގެންގޮސްފައިވަނީ 26 ޖޫން 2022 ގައި ޢާންމުކޮށް ގެޒެޓުކުރި ގެދޮރުވެރިޔާ އުސޫލަށާއި، ގެދޮރުވެރިޔާ ޕޯޓަލްގައި ހިމަނާފައިވާ އިރުޝާދުތަކަށް މައިގަނޑުގޮތެއްގައި ބަލައިގެންނެވެ. އަދި މި މަސައްކަތުގައި ރައީސުލްޖުމްހޫރިއްޔާގެ ސިޔާސަތާއި އޭސީސީގެ ތަޙުޤީޤަށް ރިޢާޔަތް ކޮށްފައި ވާނެ ކަމަށް ވެސް އެމަނިކުފާނު ވިދާޅުވިއެވެ.
މިނިސްޓަރު ވިދާޅުވީ، ވެރިފިކޭޝަން މަރުޙަލާ ކުރިއަށްދިޔައީ ޕޯޓަލްގެ ތެރެއިންކަމަށާއި، ޕޯޓަލްއިން ހުށަހަޅާފައިވާ އެއްވެސް ފޯމަކަށް ނުވަތަ ލިޔެކިޔުމަކަށް ބަދަލުގެނައުމުގެ ފުރުޞަތު އެއްވެސް މީހަކަށް ލިބިފައި ނުވާނެކަމުގެ ޔަޤީންކަން ދެއްވިއެވެ.
ކުރީގެ ސަރުކާރާއި ޚިލާފަށް މި ސަރުކާރުން މަސައްކަތް ކުރަނީ ރައްޔިތުންނަށް އިންސާފު ހޯދައި ދިނުމަށެވެ. ކުރީގެ ސަރުކާރުން ގެންގުޅުނު ބޭއިންސާފު އުޞޫލުތައް ރަނގަޅުކޮށް، ޙައްޤުވެރިންނަށް ފުލެޓު ލިބޭނެކަން ކަށަވަރު ކުރުމަށް މި ސަރުކާރުން މަސައްކަތް ކުރަމުންދާ ކަމަށް ވެސް އެމަނިކުފާނު ވިދާޅުވިއެވެ.
ފުލެޓް ލިސްޓް ޢާންމުކުރުން އެކި ފަހަރުމަތިން ވެސް ލަސްވީ އެއްވެސް މީހެއްގެ ޙައްޤެއް ގެއްލުނަ ނުދިނުމަށެވެ. ރައްޔިތުންގެ ކަންބޮޑުވުންތަކަށް އިޖާބަދިނުމުގެ ގޮތުން، އެންޓި-ކޮރަޕްކޮރަޕްޝަން ކޮމިޝަން (އޭސީސީ) އިން ވެސް މި މައްސަލަ ބަލައި ސަރުކާރަށް އިރުޝާދު ދީފައިވާކަން ފާހަގަ ކުރެވެއެވެ. އެހެންކަމުން ސަރުކާރުން ފުލެޓު ދޫކުރުމުގެ މަސައްކަތް އަލުން ފެށީ އެ އިރުޝަދުތަކާއި އެއްގޮތަށެވެ،