ޣައްޒާގެ ރައްޔިތުން އެހެން ގައުމު ތަކަށް ބަދަލު ކުރުމުގެ ޕްލޭނަށް މިސްރާއި އުރުދުންއިން އެއްބާރުލުން ނުދޭނެ ކަމަށް އެންގުމާއި ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަރަށް ބޮޑަށް ކޯފާ ވެއްޖެއެވެ.
މިޞްރުގެ ރައީސް ވަނީ އެމެރިކާ އަށް ވަޑައިގަންނަވަން ނިންމަވާފައިވާ ނިންމުން ވެސް މުއްދަތެއް ނެތް ގޮތަށް ފަސްކޮށްފައެވެ.
މިޞްރާއި އުރުދުން އިން ބުނެފައިވަނީ އެމެރިކާގެ ރައީސް ޓްރަމްޕްގެ އެ ޕެލޭނާއި ދެކޮޅުހަދާ ކަމަށެވެ.
މިކަމާއި ގުޅިގެން، އެ ދެ ގައުމަށް އެމެރިކާއިން ދޭ ހުރިހާ އެހީތަކެއް ހުއްޓާލާނެ ކަމުގެ އިންޒާރު ވައިޓް ހައުސްއިން ވަނީ ރަސްމީކޮށް ދީފައެވެ.
އެމެރިކާއިން މިސްރަށް އަހަރަކު ގާތްގަނޑަކަށް 2.5 ބިލިއަން ޑޮލަރުގެ އަސްކަރީ އެހީ ދެއެވެ. މި އެހީ ދެނީ ހަތިޔާރާއި، ތަމްރީނާއި އަދި އެހެނިހެން ވަސީލަތްތައް ފޯރުކޮށްދިނުމުގެ ގޮތުގައެވެ. އުރުދުން އަށް ދެނީ 500 މިލިއަން ޑޮލަރަށް އަރާވަރުގެ އަސްކަރީ އެހީއެކެވެ. މީގެ އިތުރުން، ޔޫއެސް އެއިޑްގެ ޕްރޮގްރާމް ތަކުގެ ދަށުން މަދަނީ އެހީ ވެސް ދެ ގައުމަށް ފޯރުކޮށްދެއެވެ.
ޓްރަމްޕް އުޅުއްވީ ޣައްޒާގެ ރައްޔިތުން އެ ސަރަހައްދުން ބޭރުކޮށް މިސްރާއި އުރުދުންގައި ވަޒަންވެރިކުރުވާށެވެ.
ނަމަވެސް އެ ޕްލޭނަށް ފާޅުގައި އެ ދެޤައުމުން ވެސް ދެކޮޅު ހަދާފައި ވެއެވެ. އިއްޔެ ނެރުނު ބަޔާންތަކެއްގައި އެ ދެ ގައުމުން ބުނެފައިވަނީ މި ޕްލޭންގައި ބައިވެރިނުވާނެ ކަމަށެވެ.
ބައިނަލްއަޤްވާމީ މީޑިއާ ތަކާއި މުޙައްލިލުންގެ ރިޕޯޓުތަކުން ދައްކާ ގޮތުގައި، ޣައްޒާގެ މައްސަލަ އާއި ވިޔަފާރީގެ ދާއިރާގައި ޓްރަމްޕް ގެންގުޅުއްވާ ހަރުކަށި ސިޔާސަތު ތަކުގެ ސަބަބުން އެމެރިކާ ދަނީ ދުނިޔޭގެ ގައުމުތަކުގެ ތާއީދު ގެއްލި، އެކަހެރި ވަމުންނެވެ. ޔޫރަޕްގެ ގައުމު ތަކާއި އޭޝިއާގެ ގައުމު ތަކުގެ އިތުރުން ގަލްފު ގައުމު ތަކުން ވެސް މި މައްސަލާގައި އެމެރިކާ އާއި ދޭތެރޭ ފޫހިވެފައިވާކަން ފާހަގަ ކުރެވެއެވެ.
އަނެއްކޮޅުން ޗައިނާއިން ދަނީ މި ފުރުސަތުގެ ބޭނުން ހިފުމަށް މަސައްކަތް ކުރަމުންނެވެ.
