ހަށިވިއްކުމުގެ ވިޔަފާރިކުރަމުން ދިޔަ 2 ބިދޭސީއަކު ޑީޕޯޓުކޮށްފައިވާ ކަމަށް އިމިގްރޭޝަނުން މިއަދު ބުނެފިއެވެ.
އިމިގްރޭޝަނުން ބުނީ ރާއްޖޭގައި ހަށިވިއްކުމުގެ ވިޔަފާރި ކުރަމުންދާކަމަށް ތުހުމަތުކުރެވޭ ބިދޭސީންނަށް އަމާޒުކޮށް އިމިގްރޭޝަނާއި ފުލުހުން ގުޅިގެން ކުރިއަށްގެންދިޔަ އޮޕަރޭޝަނެއްގައި ފުޅާދާއިރާއެއްގައި ހަށިވިއްކުމުގެ ވިޔަފާރި ކުރަމުންދިޔަ 2 ބިދޭސީ އަންހެނަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށެވެ.
އޭގެ ތެރެއިން އެކަކީ ވޯކް ވިސާގައި ރާއްޖޭގައި އުޅެމުންދިޔަ މީހެއް ކަމަށާއި އަދި ދެވަނަ މީހާއަކީ ޓޫރިސްޓު ވިސާގައި ރާއްޖެ އައިސްފައިވާ މީހެއް ކަމަށް އިމިގްރޭޝަނުން ބުންޏެވެ.
އިމިގްރޭޝަނުން ބުނީ އެ މައްސަލަ ތަހުޤީޤު ކުރުމަށްފަހު، އެ ދެ މީހުން ވެސް މިހާރު ޑީޕޯޓުކޮށްފައިވާ ކަމަށެވެ.
ހަށިވިއްކުމުގެ ވިޔަފާރީގައި އުޅުނު 7 މީހަކު މިދިޔަ ހަފްތާގައި ވެސް ވަނީ އިމިގްރޭޝަނުގެ ބެލުމުގެ ދަށަށް ގެންގޮސްފައެވެ. އޭގެ ތެރޭގައި ހިމެނެނީ ބިދޭސީ 4 އަންހެނަކާއި 3 ފިރިހެނަކު ކަމަށް އިމިގްރޭޝަނުން ބުނެފައިވެއެވެ.
