އދ. އަތޮޅުގައި ހިންގާ ރެޑިސަން ބުލޫ މޯލްޑިވްސްގައި ޗުއްޓީ ހޭދަކުރަމުންދިޔަ ފަތުރުވެރިއެއްގެ ގައިގައި ލޯންޗެއްގެ ބުރަފަތިން ޖެހި، އެ މީހާ މަރުވުމުން ފުލުހުން އެމައްސަލަ ތަހުގީގު ކުރަން ފަށައިފިއެވެ.
މިއަދު ހެނދުނު 10:00 ޖަހާ އިރު ހިނގި މި ހާދިސާގައި މަރުވެފައިވަނީ އާޖެންޓީނާއަށް ނިސްބަތްވާ 55 އަހަރުގެ ފިރިހެނެކެވެ. އޭނާ މަރުވެފައިވަނީ ހާދިސާ ހިނގިތާ އިރުކޮޅެއްގެ ތެރޭގައި ކަމަށް މަޢުލޫމާތު ލިބިފައިވެއެވެ.
މި އެކްސިޑެންޓްގައި އެ މީހާގެ އަތާއި މޫނުގެ ބައެއް ވަކިވެފައިވާ ކަމަށް ވެސް މަޢުލޫމާތު ލިބެއެވެ.
މި ހާދިސާއާ ގުޅިގެން ބައެއް ފަރާތްތަކުން ފާޑުކިޔަމުންދާއިރު، މޯލްޑިވްސް އެސޯސިއޭޝަން އޮފް ޔޮޓް އޭޖެންޓްސް (މާޔާ)ގެ ރައީސް މުހައްމަދު ނަޝީދު ވިދާޅުވެފައިވަނީ މިފަދަ ހާދިސާތައް ތަކުރާރުވަމުންދަނީ ޤާބިލުކަން ނެތް، ކެޕްޓަނުންނާއި ހުނަރު ދެރަ މީހުންގެ އިހުމާލުން ކަމަށެވެ.
ނަޝީދު ވިދާޅުވީ މިންގަނޑުތައް ދެމެހެއްޓުމަށްޓަކައި ވިސްނުން ބަދަލުކުރަން ޖެހޭ ކަމަށާއި، ތަކުރާރުކޮށް ތަޢުލީމާއި ތަމްރީނުދީ ބައުވެފައި ހުންނަ ދޯނިތަކުގެ އާލާތްތައް އާކޮށް ޒިންމާދާރު ކަމާއެކު ފަތުރުވެރިން ގޮވައިގެން އުޅޭ ފަރާތްތަކުން ވެސް އަދި ދާއިރާއާއި ގުޅުންހުރި ހުރިހާ ފަރާތްތަކުން ޢަމަލު ކުރާނަމަ މިފަދަ ކަންތައްތައް ތަކުރާރު ނުވާނެއެވެ.
މި ހާދިސާއާ ގުޅިގެން އިތުރު ޓްރެވެލް އެޖެންސީތަކުންވެސް ދަނީނކަންބޮޑުވުން ފާޅުކުރަމުންނެވެ.
