ފެންބޮޑުވެދާނެ ޙާލަތަކަށް ވެލިބަސްތާތައް ތައްޔާރުކުރުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.
ކައުންސިލުން ބުނީ ވިއްސާރަވެ ފެންބޮޑުވެދާނެ ޙާލަތަކަށް ތައްޔާރުވުމުގެ ގޮތުން، ވެލިބަސްތާތައް ތައްޔާރުކުރުމުގެ މަސައްކަތް ކުރިއަށް ދާ ކަމަށެވެ.
ކައުންސިލުން ވަނީ މޫސުމާއި ބެހޭ ޤައުމީ އިދާރާ (މެޓް) އޮފީހުން ނެރޭ މޫސުމީ އެލާޓްތަކަށް ސަމާލުވުމަށާއި ސަލާމަތީ ފިޔަވަޅުތައް އެޅުމަށް އިލްތިމާސްކޮށްފައެވެ. އިތުރަށް އިލްތިމާސްކޮށްފައިވަނީ:
-ގޭތެރޭގައި އަދި ގޯތި ތެރޭގައި ވަޔާ ގޮސްދާނެ ގޮތަށް ހުރި ތަކެތި ރައްކާތެރިކުރުން.
-ކަރަންޓު ސާމާނު އުސްތަންތަނުގައި ރައްކާކުރުން އަދި ބިމާއި ކައިރީގައި ހުންނަ ސޮކެޓްތަކުން ކަރަންޓު ކަނޑާލުން.
-ފެނުގެ އަސަރު ނުކުރާނެ ގޮތަށް މުހިންމު ލިޔެކިޔުން އަދި މުދާ އުސްތަންތަނުގައި ރައްކާކުރުން.
-ފެނުގެ އަސަރު ނުކުރާނެ ގޮތަށް ކާޑައި ކާނާގެ ބާވަތްތައް އުސްތަނެއްގައި ރައްކާކުރުން.
-ވަޔާ ވިއްސައިގެންދާނެ ފަދަ ތަކެއްޗަށް ސަމާލުވުން.
-ވައިގަދަވާނަމަ ކުޑަ ބޭނުން ނުކުރުން.
-ވެހިކަލް ދުއްވާނަމަ އެހެން ފަރާތްތަކަށް ވިސްނައިގެން ދުއްވުން.
މެޓް އޮފީހުން ބުނެފައިވަނީ މި ޙަފްތާ ބަންދުގައި މުޅި ރާއްޖެއަށް ވެސް ވިއްސާރަކުރާނެ ކަމަށެވެ. އެގޮތުން އުުތުރާއި މެދުރާއްޖެތެރެ އަދި ދެކުނަށް ވެސް މި ހުކުރު ހޮނިހިރުގައި ގުގުރުމާއެކު ވިއްސާރަކުރާނެ ކަމަށް އެ އިދާރާއިން ބުނެފައިވެއެވެ.
މެޓް އޮފީހުން މިއަދު ވަނީ ރ އަތޮޅުން ފެށިގެން ވ އަތޮޅަށް ހުދު ސަމާލުވެސް ނެރެފައެވެ. މިއަދު ހަވީރު 4:00 އިން މިރޭ 10:00 އާ ހަމައަށް އެ ސަރަޙައްދަށް ނެރެފައިވާ ހުދު ސަމާލުގައި ބުނެފައިވަނީ ބޯކޮށް ވާރޭ ވެހުމާއެކު ގުގުރާނެ ކަމަށް ލަފާކުރެވޭ ކަމަށެވެ.
މީގެ އިތުރުން މ އަތޮޅުން ފެށިގެން އައްޑޫ ސިޓީއަށް މިއަދު މެންދުރު 1:00 އިން މިރޭ 7:00 އާ ހަމައަށް ނެރެފައިވާ ހުދު ސަމާލުގައި ވެސް ބުނެފައިވަނީ ބޯކޮށް ވާރޭ ވެހުމާއެކު ގުގުރުން އަދި ވިލާގަނޑުގައި ގަޑިއަކު 40 މޭލަށް ވައި ގަދަވާނެ ކަމަށް ލަފާކުރެވޭ ކަމަށެވެ.
މެޓް އޮފީހުގެ ރިކޯޑުތައް ދައްކާ ގޮތުން ފާއިތުވި 24 ގަޑިއިރުގެ ތެރޭގައި އެންމެ ގިނައިން ވާރޭ ވެހިފައިވަނީ ގއ. ގެމަނަފުއްޓަށެވެ. އެ ރަށަށް 148.6 މިލިމީޓަރުގެ ވާރޭ ވަނީ ވެހިފައެވެ.
