ސަރުކާރުގެ ކެބިނެޓަށް ގެނެވުނު ބަދަލަކާއި ގުޅިގެން، މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ގެ ނަން އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާ ގެ ނަމަށް ބަދަލުކޮށްފިއެވެ.
މިއާއެކު، ގެދޮރުވެރިކަމާ ބެހޭ ހުރިހާ މަޝްރޫޢުތަކުގެ މަސައްކަތް މިއަދުން ފެށިގެން ކުރިއަށް ގެންދާނީ އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާގެ ބެލުމުގެ ދަށުންނެވެ.
އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ނެރުނު ނޫސްބަޔާނެއްގައި ބުނެފައިވާ ގޮތުގައި، މި ބަދަލާއި ގުޅިގެން ވުޒާރާގެ ނަން ބަދަލުވެފައިވީ ނަމަވެސް، މިހާރު ދެމުންދާ އެއްވެސް ޚިދުމަތަކަށް ބަދަލެއް ނާންނާނެއެވެ.
ގެދޮރުވެރިކަމާ ބެހޭގޮތުން އެއްވެސް މަޢުލޫމާތެއް ސާފުކުރަން ބޭނުންވާ ފަރާތްތަކަށް މިނިސްޓްރީގެ ރަސްމީ ފޯނު ނަންބަރުތަކަށް ގުޅުމަށް ވުޒާރާއިން އެދިފައިވެއެވެ. މި ނަންބަރުތަކަކީ 4004900 އަދި 4004901 އެވެ.
